प्रहरीले रुपन्देहीका विभिन्न स्थानबाट भन्सार छलेर ल्याइएका अवैध सामान नियन्त्रणमा लिएको छ।
जिल्ला प्रहरी कार्यालय रुपन्देहीका अनुसार जिल्लाका विभिन्न स्थानमा खटिएको प्रहरी टोलीले चेकजाच गर्ने क्रममा भारतबाट अवैध रुपमा नेपाल तर्फ ल्याउँदै गरेका सामानहरु नियन्त्रणमा लिएर भैरहवा भन्सार कार्यालय बुझाएको हो।
जिल्ला प्रहरी कार्यालयका प्रवक्ता प्रहरी नायब उपरीक्षक मनोहर भट्टका अनुसार यसरी नियन्त्रणमा लिईएका सामानहरुमा फ्रिज, कुलर, केराउ, कुखुरा, प्याज, स्प्राइट, घासको बिउ, चकलेट, मसला, वासर, अगरबत्ती र पटका समेत रहेको छ।
नियन्त्रणमा लिइएका सबै सामानलाई आवश्यक कारवाहीका लागी भैरहवा भन्सार कार्यालय तथा पशु क्वारेन्टाइन चेक पोष्ट कार्यालय बेलहियामा बुझाइएको प्रहरी नायब उपरीक्षक भट्टले बताए।
रुपन्देहीको सिद्धार्थनगर, मायादेवी, कोटहिमाइ, लुम्बिनी, रोहिणी लगायतका स्थानबाट अवैध सामानहरु नियन्त्रणमा लिएपनि सामान ल्याउने व्यक्तिहरुलाई भने प्रहरीले नियन्त्रणमा लिएको छैन।
प्रहरीले अवैध रुपमा ल्याइएका सामान नियन्त्रणमा लिने तर सामान ल्याउने व्यक्तिहरुलाई पक्राउ नगर्दा भन्सार छलि गरी सामान ल्याउने क्रम रोकिएको छैन।
प्रहरी नायब उपरीक्षक भट्टले प्रहरीलाई देख्ने बित्तिकै तस्करीमा संलग्नहरु सामान छोडेर भाग्ने गरेका कारण उनीहरुलाई पक्राउ गर्न नसकिएको बताए।