इलाम–२ मा सुहाङ नेम्वाङले समानुपातिकमा एमालेले पाएको भन्दा धेरै मत पाएका छन्।
उनी मंगलबार बिहान सकिएको मत गणनाअनुसार २७ हजार ७७२ मत ल्याएर निर्वाचित भए।
उनका निकटतम प्रतिद्वन्द्वी नेपाली कांग्रेसका डम्बर खड्काले २१ हजार ९४२ मत ल्याए।
नजिकका प्रतिस्पर्धीभन्दा ५ हजार ८३० को मतान्तरले निर्वाचित भएका सुहाङले पार्टीले समानुपातिकमा प्राप्त गरेको मतलाई पनि उछिने।
२०७९ सालको प्रतिनिधि सभा निर्वाचनमा एमालेले त्यस क्षेत्रमा समानुपातिकतर्फ २६ हजार ५६२ मत ल्याएका थियो।
अहिले सुहाङले १ हजार २१० मत बढी ल्याए।
त्यसो हुनुमा माओवादी केन्द्र र नेत्रविक्रम चन्द नेतृत्वको नेपाल कम्युनिस्ट पार्टीको मत पनि कारक हुनसक्छ।
नेकपा (एमाले)लाई यसपटक माओवादी केन्द्र र नेकपाले सघाएका थिए।
नेकपाले यसअघि त्यस क्षेत्रमा निर्वाचनमा भाग नलिएकाले उसको मत कति थियो भनेर यकिन गर्न गाह्रो हुन्छ।
माओवादी केन्द्रले भने त्यस क्षेत्रबाट समानुपातिकतर्फ ५ हजार १५३ मत प्राप्त गरेको थियो। यसरी हेर्दा सुहाङले अझै मत बढाउनुपर्ने थियो।
उनको मत नबढ्नुमा स्वतन्त्र उम्मेदवार डकेन्द्रसिंह थेगिम र राष्ट्रिय स्वतन्त्र पार्टीका उम्मेदवार मिलन लिम्बूले प्राप्त गरेको मतलाई कारण मान्न सकिन्छ।
इलाम–२ मा थेगिमले मुख्य दललाई ठूलै चुनौती थिए। कोशी नामकरणछि उठेको पहिचानको आन्दोलनको बलमा उम्मेदवारी दिएका थेगिमले ११ हजार ४५७ मत प्राप्त गरे।
थेगिम पहिचानको आन्दोलनका अगुवा पनि हुन्। त्यही आन्दोलनका ४३ भन्दा बढी घटकले उनलाई साझा उम्मेदवारका रूपमा प्रस्तुत गरेका थिए।
त्यही कारण उनले विगतमा एमाले, नेपाली कांग्रेस र माओवादी केन्द्रतर्फ गएको मत तान्न सफल भए।
कुल सदर मतको १० प्रतिशत कटाउन नसके पनि राष्ट्रिय स्वतन्त्र पार्टी (रास्वपा) ले पनि मत बढायो।
रास्वपाले अघिल्लो पटकभन्दा ३ सय ६४ मत बढायो।
उसले अघिल्लोपटक समानुपातिकतर्फ ४ हजार ६८६ मत प्राप्त गरेको थियो।
यसपटक रास्वपा उम्मेदवार मिलन लिम्बूले ५ हजार ५० मत प्राप्त गरे।
नेपाली कांग्रेसका उम्मेदवार डम्बर खड्काले भने अघिल्लोपटक पार्टीले प्राप्त गरेको समानुपातिक मत पनि जोगाउन सकेनन्।
इलाम–२ मा त्यतिबेला नेपाली कांग्रेसले समानुपातिकतर्फ २२ हजार ३३३ मत प्राप्त गरेको थियो।
इलाम–२ मा अघिल्लोपटक भन्दा ४२२ मतदाता थप हुँदा र बढी मत पनि खस्दा ३ सय ९१ मत कम ल्याए।
इलाम–२ मा अघिल्लोपटक १ लाख १५ हजार ४६७ मतदाता रहेका थिए। यसपटक १ लाख १५ हजार ८८९ मतदाता रहेका थिए।
इलाममा यसपटक ५९.८६ अर्थात् ६९ हजार ३७४ मत खसेको थियो। जसमध्ये ६८ हजार ४७२ सदर र ९०२ मत बदर भएको थियो।