राष्ट्रिय प्रजातन्त्र पार्टी गण्डकीका सांसद पञ्चराम गुरुङले वर्तमान सत्ता गठबन्धन पवित्र नभएको बताएका छन्।
प्रदेश सभामा मुख्यमन्त्री खगराज अधिकारीले राखेको विश्वासको मत सम्बन्धी प्रस्ताव उपर बोल्दै गुरुङले उक्त कुरा बताएका हुन्।
‘जनताले उठाएको प्रश्नमा छानविन गरौं भन्दा पनि हुँदैन भनेर गठबन्धन अघि बढेको छ, यसले यो गठबन्धन पवित्र छैन भन्ने निर्णय राप्रपाले गरेको छ,’ उनले सदनमा भने, ‘त्यसले मुख्यमन्त्रीले राख्नुभएको विश्वासको मत सम्बन्धी प्रस्तावमा हाम्रो पार्टीले मत नदिने र तटस्थ बस्ने सदनलाई जानकारी गराउँछु।’
जनताले कुनै एउटा दललाई मात्र बहुमत दिएर पूर्ण विश्वास गर्न नसकेको अवस्था रहेको भन्दै उनले यसको अर्थ दलहरू मिलेर विकास र सुशासनमा लाग्नुपर्ने बताए। तर, सत्तारुढ नेताहरूले सडकदेखि सदनसम्म आरोप, प्रत्यारोप र दम्भका मन्तव्य दिँदै हिडेको उनले आरोप लगाए।
गण्डकीमा सरकार बनाउन राप्रपाका २ जना सांसद निर्णायक छन्। प्रदेश सभामा कांग्रेसको २७, एमालेको २२, माओवादी केन्द्रको सभामुखसहित ८, राप्रपाको २ र स्वतन्त्र सांसद राजीव गुरुङ ‘दीपक मनाङे’ गरी ६० जना छन्।
यस हिसाबले गण्डकीमा सरकार गठन गर्न कम्तिमा ३१ जना सांसदको समर्थन चाहिन्छ। सर्वोच्च अदालतले गण्डकी सरकार गठनबारे दिएको आदेशमा ३० जना सांसदले पनि बहुमत पुग्ने व्याख्याले गण्डकीमा अन्यौल बढेको छ।
