नेकपा एमालेका प्रमुख सचेतक महेश बर्तौलाले २०१५ सालदेखिका संसदीय गतिविधिलाई सर्वसाधारणले सजिलै भेट्ने गरी वेबसाइटमा राख्न माग गरेका छन्।
मंगलबार प्रतिनिधिसभा बैठकको शून्य समयमा बोल्दै प्रमुख सचेतक बर्तौलाले नेपालको संसदीय अभ्यास २०१५ बाट सुरू भए पनि त्यो बेलादेखिका संसदीय गतिविधि अभिलेख आन्तरिक रूपमा भए पनि सर्वसाधारणको पहुँचमा नआएको बताए।
उनले अहिलेसम्म हेर्दा विभिन्न खालका संसदका अभिलेखहरूलाई व्यवस्थित रूपमा सर्वसाधारणले सजिलै पाउन नसकेको बताए।
उनले संसदका समग्र गतिविधिहरूलाई सजिलै हेर्नसक्ने गरी वेबसाइटमा ल्याउन माग गरे। उनले २००८ देखिका राजपत्र, २०१३ सालदेखि पत्रिका र देशभर फौजदारी मुद्दा कस्तो छ भनेर खोज्दा सर्वोच्चको साइटमा भेट्न सकिने तर संसदको समग्र गतिविधिलाई व्यवस्थित ढङ्गमार्फत् राखिएको नभेटिने अवस्थाको अन्त्य गर्नुपर्ने बताए।
उनले भने,‘नेपालको संसदीय अभ्यास २०१५ बाट सुरू भयो। २०१५ सालदेखिका अभिलेख आन्तरिक रूपमा होला तर पब्लिक डोमेनमा आएन। अहिलेसम्म हेर्दा विभिन्न खालका संसदका अभिलेखहरूलाई व्यवस्थित रूपमा सर्वसाधारणले सजिलै पुर्याउन सकेका छैनौं। आज सभामुखमार्फत् ध्यानाकर्षण गराउन चाहन्छु। संसदका समग्र गतिविधिहरूलाई वेबसाइटमार्फत् सजिलै हेर्न सकिने गरी पब्लिक डोमेनमा ल्याउन माग गर्न चाहन्छु। २००८ देखिका राजपत्र खोज्दा भेट्न सक्छौं। २०१३ सालदेखि पत्रिका भेट्न सक्छौं। देशभर फौजदारी मुद्दा कस्तो छ भनेर खोज्दा सर्वोच्चको साइटमा हेर्ने हो भने भेट्न सकिन्छ। मन्त्रिपरिषद्का निर्णयहरू पनि समरिका रूपमा भेट्नसक्छौं तर संसदको समग्र गतिविधिलाई व्यवस्थित ढङ्गमार्फत् राखिएको अवस्था छैन। व्यवस्थित गर्न माग गर्दछु।’
उनले संसदीय गतिविधिलाई ऐतिहासिक सम्पत्तिको रूपमा सर्वसाधारणले सजिलै पाउने गरी व्यवस्थित गर्न आवश्यक रहेको बताए।—न्युज एजेन्सी नेपाल
