प्रधानमन्त्री केपी शर्मा ओलीले नेकपा (एकीकृत समाजवादी)का सांसद प्रकाश ज्वालालाई रणनीतिक सडक र पालिका अस्पताल बनाउने कार्यक्रम आफैले रद्द गरेर आफैले प्रश्न गरेको जबाफ दिएका छन्।
आइतबार संसदमा प्रधानमन्त्रीसँगको प्रश्नोत्तर कार्यक्रममा सांसद ज्वालाले यसअघि प्रधानमन्त्री हुँदा ओलीले तामझामका साथ शिलान्यास गरेका १६५ निर्वाचन क्षेत्रीय रणनीतिक सडक र पालिका अस्पतालको निर्माण कहाँ पुग्यो भनेर प्रश्न गरेका थिए।
जबाफमा प्रधानमन्त्री ओलीले शिलान्यास गरेपछि आफू नेतृत्वको सरकार परिवर्तन भएको र त्यसपछिका सरकारले ती कार्यक्रम रद्द गरेको बताए।
'प्रश्नकर्ता माननीय पनि त्यसपछिका सरकारमा भौतिक पूर्वाधार मन्त्री हुनुहुन्थ्यो। कार्यक्रमहरू रद्द गर्नेले नै फेरि कार्यक्रम किन पूरा भएन भनेर प्रश्न गर्ने, त्यसको प्रगती खोज्ने, त्यो किन सम्पन्न भएन भनेर सोध्ने हाम्रो अनौठो संस्कार,' उनले भने।
प्रधानमन्त्री ओलीले सबै सडक र अस्पतालहरूको निर्माण सम्पन्न गर्न ठूलो बजेटको आवश्यकता पर्ने र ती अस्पतालहरू केही संख्यामा निर्माण सम्पन्न भएको जानकारी गराए।
'उपलब्ध स्रोत र साधनलाई ध्यान दिई बाँकी सडक र अस्पतालहरू प्राथमिकता पूर्वक निर्माण भइरहेका छन्। हामी फेरि सरकारमा आएको ६ महिना पुग्यो। उपलब्ध स्रोत र साधनको प्राथमिकताकासाथ विनियोजन गरिरहेको र आगामी वर्ष पनि प्राथमिकतापूर्वक विनियोजन गरिने छ,' उनले भने।
प्रधानमन्त्री ओलीले नेपालभर रहेका हरेक निर्वाचन क्षेत्रहरूमा तुलानात्मक रुपमा घना बस्ती भएका स्थानहरू एवम् स्थानीय प्राथमिकतामा परेका रुट हुँदै जाने भएकाले निर्वाचन क्षेत्र रणनीतिक सडक कार्यक्रम प्रभावकारी सावित भएको पनि बताए।
'हालसम्म यसको प्रगति करिव ५८ % रहेको छ भने अधिकांश सडकहरू यस आर्थिक वर्षमा नै सकिने भएकाले सरकारले उच्च प्राथमिकताकासाथ बजेट व्यबस्थापन गर्ने विश्वास दिलाउन चाहन्छु,' उनले भने।
