नेपाली कांग्रेसका महामन्त्री विश्वप्रकाश शर्मा सगरमाथा आरोहणको यात्रा पूरा नगरी सोमबार काठमाडौं फर्केका छन्।
मौसमी प्रतिकूलताका कारण अरू धेरै आरोहीहरूसँगै शर्मा पनि आरोहण पूरा नगरी फर्केका हुन्।
‘मौसमी प्रतिकूलताका कारण उहाँको आरोहण यात्रा यसपटक पूरा हुन पाएन,’ शर्मा पत्नी कविता शर्माले भनिन्, ‘उहाँ आज काठमाडौं फर्कनुभयो। घर आइपुग्नुभएको छैन। विमानस्थल आइपुग्नुभयो।’
महामन्त्री विश्वप्रकाश शर्मा गएको साता सगरमाथाको ‘क्याम्प थ्री’ नजिक पुगेर शुक्रबार ‘क्याम्प टु’ मै फर्किएका थिए।
सगरमाथाको क्याम्प थ्री नजिकै पुगिसकेका महामन्त्री शर्मा प्रतिकूल मौसमले एक सय मिटर अघिबाट क्याम्प टु फर्कन बाध्य भएका थिए।
‘प्रतिकूल मौसमले उहाँलाई फर्कन बाध्य पारेको थियो,’ लियाजो अफिसर पासाङ भोटेले भने, ‘मौसममा सुधार होला कि भनेर केही दिन बेसक्याम्पमै रहनुभयो। मौसममा सुधार नभएपछि उहाँ फर्कनुभयो।’
यहीबेला क्याम्प फोरमा पुगिसकेको भारतीय सैनिक टोली पनि यही कारण क्याम्प टुमा फर्केको थियो।
सगरमाथाको क्याम्प टु ६ हजार ४ सय मिटरको उचाइमा छ भने क्याम्प थ्री ७ हजार २ सय मिटरको उचाइमा छ।
महामन्त्री शर्मा ७ हजार १ सय मिटरको उचाइमा पुगिसकेका थिए।
यसअघि लोबुचे हिमालको सफल आरोहण गरिसकेका महामन्त्री शर्माले सोमबार मात्रै बेसक्याम्पबाट प्रधानमन्त्री केपी शर्मा ओलीलाई पत्र लेख्दै जलवायु परिवर्तन र हिमाल सुरक्षाबारे ध्यानाकर्षण गराएका छन्।
