कोशी प्रदेश सरकारले धनकुटा जिल्ला अस्पताल मनमोहन प्राविधिक विश्वविद्यालयलाई हस्तान्तरण गर्ने निर्णय गरेको छ।
प्रदेश मन्त्रिपरिषदको सोमबारको बैठकले यस्तो निर्णय गरेको आन्तरिक मामिला तथा कानुनमन्त्री रेवतीरमण भण्डारीले जानकारी दिए। सरकारका प्रवक्तासमेत रहेका उनले भने, ‘सरकारले नीतिगत निर्णय गरेको छ। अब प्रक्रिया सुरू भएको छ।’
कोशी प्रदेश सरकारको मातहतमा रहेको एक मात्र विश्वविद्यालय मनमोहनले चिकित्साशास्त्रसँग सम्बद्ध विषयको पढाइका लागि अस्पताल बनाइदिन वा कुनै अस्पताल हस्तान्तरण गर्न माग गर्दै आएको थियो। सोही अनुसार धनकुटा जिल्ला अस्पताल विश्वविद्यालयलाई हस्तान्तरण भएको हो।
अस्पताल भए बिएस्सी नर्सिङ, अप्टोमेट्री, ल्याबरोटरी टेक्नोलोजी, रेडियोलोजी तथा एमबिबिएस लगायतका शैक्षिक कार्यक्रम सञ्चालन गर्न अस्पताल अनिवार्य भएको विश्वविद्यालयको भनाइ थियो।
मन्त्रिपरिषदले खोटाङ जिल्ला अस्पतालको हालको १५ शय्यालाई बढाएर ५० शय्यामा विस्तार गर्ने निर्णय पनि गरेको छ।
भौतिक पूर्वाधार विकास मन्त्रालय मातहतका कार्यालयहरूको व्यवस्थापनसम्बन्धी प्रतिवेदनलाई प्रदेश सरकारको राजनीतिक तथा प्रशासनिक समितिमा अध्ययनका लागि पठाउने निर्णय गरिएको र समितिबाट राय आएपछि मात्र स्वीकृत गर्ने बैठकले निर्णय गरेको मन्त्री भण्डारीले जानकारी दिए।
बैठकले आन्तरिक मामिला तथा कानुन मन्त्रालयको प्रस्तावमा सवारी चालक अनुमति पत्र परीक्षा सञ्चालन निर्देशिका २०८२ स्वीकृत गरेको छ।
मन्त्री भण्डारीका अनुसार यो निर्देशिकाबाट परीक्षा प्रक्रिया थप पारदर्शी, मर्यादित र नागरिकमैत्री हुनेछ।
