नेसपाबाट आएकाहरूलाई माओवादीले दियो जिम्मेवारी, कसलाई के?

सेतोपाटी संवाददाता

काठमाडौं, जेठ २०

माओवादी सचिव गंगानारायण श्रेष्ठ। फाइल तस्बिर।

नेपाल समाजवादी पार्टीबाट आएका नेताहरूलाई नेकपा (माओवादी केन्द्र) ले जिम्मेवारी दिएको छ।

गंगानारायण श्रेष्ठ नेतृत्वको नेसपा जेठ १२ गते माओवादीमा समाहित भएको थियो। सोही दिन माओवादीले गंगानारायण श्रेष्ठलाई सचिव मनोनीत गरेको थियो।

सिन्धुलीका श्रेष्ठ बागमती प्रदेश सभा सदस्य छन्। उनी नेसपामा सहअध्यक्ष थिए।

महिन्द्र राय यादव नेतृत्वको नेसपा माओवादीमा समाहित हुन नमानेपछि श्रेष्ठसहित १७ केन्द्रीय कार्यकारिणी समिति सदस्यहरूसहित नेता कार्यकर्ताहरू भने माओवादीमा समाहित भएका थिए।

नेसपाबाट आएका १७ जना केन्द्रीय कार्यकारिणी समिति सदस्यहरूलाई माओवादी केन्द्रले जिम्मेवारी दिइसकेको सचिव श्रेष्ठले सेतोपाटीलाई जानकारी दिए।

‘हामी १७ जना केन्द्रीय कार्यकारिणी समिति सदस्य आएकोमा म सचिव भएँ, १४ जना केन्द्रीय सदस्य हुनुभयो भने दुई जना वैकल्पिक केन्द्रीय सदस्य हुनुभएको छ,’ उनले भने, ‘थप साथीहरूलाई वैकल्पिक केन्द्रीय सदस्य बनाउने कुराकानी भइरहेको छ।’

सचिव श्रेष्ठसहित यी नेताहरूले बाबुराम भट्टराईसँगै २०७२ मा माओवादी परित्याग गरेका थिए। भट्टराई नेसपा (नयाँ शक्ति) गठन गरेर पहिलो महाधिवेशनसमेत गरेर अध्यक्ष निर्वाचित भएका छन्। उनी माओवादीमा एकीकरण गर्न तयार भएनन्।

भट्टराई माओवादीमा नफर्किए पनि श्रेष्ठसहित नेताहरू १० वर्षपछि माओवादीमै फर्किएका छन्।

को-को भए केन्द्रीय सदस्य?

१) बन्दना सुवेदी (सिन्धुली)

२) सुरदबहादुर स्याङ्तान (सिन्धुली)

३) अक्कलबहादुर थिङ (काभ्रे)

४) राजेन्द्र कुमार किराती (संखुवासभा)

५) खुम्बराज खत्री (उदयपुर)

६) दुर्गा न्यौपाने (गोरखा)

७) ज्ञानेन्द्र कुमाल (गोरखा)

८) रमेश पोखरेल (गोरखा)

९) शिव सुन्दर शाही (अछाम)

१०) रामकैलाश यादव (सर्लाही)