राष्ट्रिय स्वतन्त्र पार्टी (रास्वपा) को संसदीय दलको बैठक रुपन्देहीको भैरहवामा बसेको छ।
रास्वपाले पहिलोपटक राजधानीभन्दा बाहिर संसदीय दलको बैठक राखेको हो।
बुटवलको सुप्रिम सहकारी ठगी प्रकरणमा पार्टीका सभापति रवि लामिछाने जिल्ला कारागार भैरहवा रहेको बेला उनलाई ढाडस दिन संसदीय बैठक भैरहवामै राखिएको रास्वपाका प्रमुख सचेतक सन्तोष परियारले जानकारी दिए।
सुप्रिम सहकारी ठगी प्रकरणमा उच्च अदालत बुटवल इजलासको आदेशपछि लामिछाने पुर्पक्षका लागि भैरहवा कारागारमा छन्।
संसदीय दलको बैठकले चालु बजेट अधिवेशनमा भएका गतिविधिको समिक्षा गरेको र पार्टीले जनताको मुद्दा संसदमा स्थापित गर्न सफल भएको निचोड निस्किएको रास्वपा संसदीय दलका प्रमुख सचेतक सन्तोष परियारले बताए।
बैठकले भिजिट भिसाको आवरणमा भएको भ्रष्टाचार र मानव बेचबिखनका मुद्दा पार्टीले संसदमा उठाएर राज्यले नीतिगत रूपमा जनतालाई दुख दिएको कुरा स्थापित गरेको परियारले बताए।
यस्तै, भ्रष्टाचारका अन्य मुद्दाहरूमा समेत रास्वपाले उठाएका मुद्धाहरू स्थापित हुँदै गएको उनको भनाइ छ।
'रास्वापाले संख्याका आधारमा दम्भ देखाउने सत्ताधारीसँग सम्झौता गरेन भन्ने सन्देश नागरिकबाट पाएको छ,' उनले भने, 'त्यसलाई कायम राख्दै संवादको ढोका पनि खुला राख्दै संसदमा जारी भिजिट भिसाको आवरणमा भएको भ्रष्टाचार र त्यससँग सम्बन्धित अन्य मुद्धालाई लिएर आन्दोलन जारी राख्ने निर्णय भएको छ।'
उनले संसदमा गर्न नहुने कुराका लागि संख्या होइन भन्ने रास्वपाको ठम्याइ रहेको बताए। त्यसैले नेपाली कांग्रेस, एमाले र माओवादी पनि जनताको गम्भीर मुद्धामा एकमत भएर रास्वपाले उठाएका मुद्धामा सहमति जनाउनेछन् भन्ने निश्कर्ष निकालेको उनले बताए।
उनका अनुसार देशमा मौलाएको संगठित अपराधविरूद्ध रास्वपाले सदन र सडकबाट प्रतिवाद गर्नेछ।
बैठकले आगामी दिनमा रूपहरू परिवर्तन गरेर आन्दोलन जारी राख्ने निर्णय गरेको छ।
यस्तै, भैरहवाका पर्यटन व्यवसायी उठाएका गौतमबुद्ध विमानस्थल सञ्चालन मुद्दालाई रास्वपाले थप उठाउने पनि परियारले बताए।
'संसदमा दर्ता भूमि विधेयकमा नियत सही नभएको पार्टीले निष्कर्ष निकालेको छ,' उनले भने, 'पोखराको लिचीबारीको जग्गा प्रकरणमा भएको भ्रष्टाचार संलग्न सबैलाई कारबाही हुनुपर्ने माग छ।'
यस्तै, पार्टी सभापति लामिछानेमाथि भएको राजनीतिक प्रतिशोधविरूद्ध जारी हस्ताक्षर अभियानलाई निरन्तरता दिने बैठकले निर्णय गरेको छ।
बैठकमा संसदीय गतिविधिबारे प्रमुख सचेतक परियार, हस्ताक्षर अभियानबारे कार्यबाहक सभापति डोलप्रसाद अर्यालले भनाइ राखेका थिए। यस्तै सहभागी सांसदहरूले समसामयिक विषयमा आफ्ना धारणा व्यक्त गरेका थिए।
रास्वपका संघीय सांसदहरूले बुधबार बिहान कार्यकर्ता भेटघाटका लागि रूपन्देहीका १० पालिकामा पुगेका थिए। यस्तै, कार्यबाहक सभापति अर्यालसहित केही सांसदले भैरहवा कारागार पुगेर सभापति लामिछानेलाई भेटेका थिए।
दिउँसो पौने दुई बजेदेखि साँझ पाँच बजेसम्म संसदीय दलको बैठक बसेको थियो।
प्रमुख सचेतक परियारले सातै प्रदेश विस्तारै संसदीय दलको बैठक राख्ने बताए।
-1746009348.jpg)
