दाङ घोराहीस्थित सगरमाथा सिमेन्टको निर्माणाधीन भवनमा आगलागी भएको छ।
घोराही उपमहानगरपालिका वडा नं. ३ गोग्लीस्थित सिमेन्ट कारखानाको नयाँ निर्माणाधीन भवनमा बिहिबार बिहान ५ तिर आगलागी हुँदा १५ लाख बराबरको क्षति भएको बताइएको छ ।
सिमेन्ट कारखानाको निर्माणाधीन सिएसपी भवनको ३५ मिटरमाथि मजदूरले जाडो छल्न बालेको आगोबाट आगोलागी भएको दाङका प्रहरी प्रमुख बेलबहादुर पाण्डेले जानकारी दिए।
‘मजदूरले प्लाइउड जलाएर आगो ताप्दा आगोलागी भएको देखिन्छ,’ एसपी पाण्डेले भने।
आगलागीमा कुनै मानवीय क्षति नभएको प्रहरीले बताएको छ। आगलागीबाट प्लाइ, वल्डिङ मेसिन ५ वटा, ग्रिल मेसिन र ३ वटा ग्यास सिलिन्डरमा क्षति भएको प्रहरीले जानकारी दिएको छ ।
