दाङका एक युवालाई प्रहरीले मध्यरातमा नल कटुवा पेस्तोलसहित पक्राउ गरेको छ ।
जिल्लाको पहाडी क्षेत्र बंगलाचुली गाउँपालिका वडा नं. ४ मुलटापा निवासी ३० बर्षीय शिवबहादुर विकलाई प्रहरीले पेस्तोलसहित पक्राउ गरेको हो ।
मदिराले मातेका विकले पेस्तोल ताक्दै सर्वसाधारणलाई त्रसित पारेको सुचनाको आधारमा शनिवार विहान २ बजेतिर ईलाका प्रहरी कार्यालय कमिरेचौरले उनलाई पेस्तोलसहित पक्राउ गरेको हो ।
प्रहरी नायव निरिक्षक गोपालप्रशाद शर्माको कमाण्डमा खटिएको प्रहरीले विकलाई विकलाई प्रक्राउ गरेको हो ।
‘मादक पदार्थ सेवन गरि विकले मध्यरातमा सर्वसाधारणलाई पेस्तोल ताक्दै मार्छु भन्दै धम्की दिने गरेको रहेछ । त्यो सूचना प्रहरीमा आएपछि हामी गएर विकलाई पेस्तोलसहित पक्राउ गरेका हौं,’ शर्माले भने ।
मदिराले मातेका विकले स्थानीय होटेलमा बास बसेका टिप्पर चालकहरु घोराही उपमहानगरपालिका वडा नं. ३ निवासी २६ बर्षीय इन्द्रबहादुर नेपाली, सोही ठाउँ निवासी ३५ बर्षीय पदम केसी, सोही ठाउँकै सुरेश नेपाली लगाएत ६-७ जनालाई एक्कासी पेस्तोल ताक्दै ज्यान लिन्छु भन्दै आतंकित पारिरहेको अवस्थामा विकलाई हतियारसहित पक्राउ गरिएको जिल्ला प्रहरी प्रवक्ता विनोद विक्रम शाहले बताए ।
यसैबीच घटना अनुसन्धानका लागि जिल्ला प्रहरी कार्यालय घोराही बाट प्रहरी निरिक्षक राजन गौतमको कमाण्डमा प्रहरी टोली खटाइएको प्रहरीले बताएको छ ।
