काठमाडौंको कीर्तिपुरस्थित एक मासु पसलभित्र लागुऔषध किनबेच गरिरहेको अवस्थामा प्रहरीले चार जनालाई पक्राउ गरेको छ।
कीर्तिपुर नगरपालिका वडा नम्बर ८ पाँगा बस्ने विष्णु श्रेष्ठले सञ्चालन गर्दै आएको युनिक एण्ड युनिशा मिट सपबाट प्रहरीले चार जनालाई पक्राउ गरेको हो।
लागुऔषध किनबेच भइरहेको भन्ने सूचनाको आधारमा प्रहरी वृत्त कीर्तिपुरबाट खटिएको प्रहरी निरीक्षकको टोलीले उनीहरूलाई मंगलबार पक्राउ गरेको थियो। वृत्तले घटनाबारे शुक्रबार सार्वजनिक गरेको हो।
श्रेष्ठसहित काभ्रेका ३० वर्षीय सन्तोष घिमिरे, मुगुका २७ वर्षीय संगीत भट्ट र बझाङका २६ वर्षीय दिनेश जोशी पक्राउ परेका छन्।
उनीहरूबाट एक किलो ५०० ग्राम गाँजा, १२२ फाइल ट्रामाडोल, १३ ट्याब्लेट नाइट्राभेट बरामद भएको छ।
उनीहरूमाथि जिल्ला अदालत काठमाडौंबाट म्याद थपेर अनुसन्धान भइरहेको छ।
