दोलखामा गाडी दुर्घटना भएको छ।
गौरीशंकर गाउँपालिका-४ जुगु झ्याकु भित्री सडक खण्डबाट झ्याकुतर्फ जाँदै गरेको बा च २० च ७२६६ नम्बरको गाडी आइतबार साँझ दुर्घटना भएको हो।
दुर्घटनामा दुई जनाको मृत्यु भएको छ भने चार जना घाइते भएको जिल्ला प्रहरी कार्यालय दोलखाका सूचना अधिकारी इन्सपेक्टर शत्रुधनकुमार महतोले जानकारी दिए।
उनका अनुसार गौरीशंकर गाउँपालिका-३ की ७५ वर्षीया काली शेर्पा र ६० वर्षीया पसि शेर्पाको मृत्यु भएको हो।
उनीहरूको उपचारको क्रममा रोल्वालिङ सामुदायिक अस्पतालमा मृत्यु भएको इन्सपेक्टर महतोले बताए।
घाइते हुनेमा गौरीशंकर गाउँपालिका-३ कै ३५ वर्षीय निङ्मा शेर्पा, ६० वर्षीय निङ्मार तामाङ, ६५ वर्षीया अन्शु शेर्पा र २२ वर्षीया डेम्मा शेर्पा छन्।
'उनीहरूको अवस्था मध्यम छ,' उनले भने, 'रोल्वालिङ सामुदायिक अस्पतालमा उपचार भइरहेको छ।'
दुर्घटना कसरी भयो भन्नेबारे प्रहरीले अनुसन्धान गरिरहेको उनले जानकारी दिए।
