गुल्मीमा बिहीबार बेलुका स्कुटर दुर्घटना हुँदा भिरबाट खोलामा खसेका दुई जनाको मृत्यु भएको छ।
बेलुका पाँच बजेतिर लु १७ प १६४४ नम्बरको स्कुटर दुर्घटना हुँदा चन्द्रकोट गाउँपालिका–६ का ४० वर्षीय किरण थापा र ३२ वर्षीय विनोद विक भिरबाट झन्डै दुई सय मिटरमुनि सिस्ने खोलामा खसेका थिए।
स्कुटर सडकछेउमै आड लागेर पल्टिए पनि त्यसमा सवार दुवै जना भिरबाट खोलामा खस्न पुगेको जिल्ला प्रहरी प्रमुख एसपी राजन भुजेलले सेतोपाटीलाई बताए।
'दुवै जना च्युरेनी भिरबाट झन्डै दुई सय मिटर तल सिस्ने खोलामा पानीमा तैरिरहेको अवस्थामा फेला परेका थिए,' एसपी भुजलले भने, 'दुवैलाई अस्पताल पुर्याउना साथ चिकित्सकले मृत घोषणा गरेका थिए।'
घटनाबारे थप अनुसन्धान भइरहेको प्रहरीले जनाएको छ।
