कपिलवस्तुमा दुई समूहबीच झडप हुँदा ९ जना घाइते भएका छन्।
बुधबार दिउँसो कपिलवस्तु नगरपालिका- ५ बभनीमा स्थानीय दुई समूहबीच भएको सामान्य झगडा झडपमा परिणत हुँदा नौ जना घाइते भएको जिल्ला प्रहरी कार्यालय कपिलवस्तुका प्रवक्ता प्रहरी नायब उपरीक्षक मोहनमणी अधिकारीले जानकारी दिए।
उनका अनुसार उक्त झडपमा एउटा समूहबाट ७ र अर्को समूहबाट २ जना घाइते भएका छन्।
बभनीका ३० वर्षीय शैलेन्द्रकुमार खरबिन, ५५ वर्षीय रामप्रसाद यादव, १५ वर्षीय बरजु यादव, १९ वर्षीय मनिष कलवार, २१ वर्षीय हरिराम यादव र ३५ वर्षीय दिपक धोबी घाइते भएका छन्। घाइते रामप्रसादको अवस्था भने गम्भीर रहेको उनले बताए।
त्यस्तै, अर्को समूहतर्फ बभनीकै २१ वर्षीय सरफोदिन बनिया र ३५ वर्षीय रमजात मुसलमान घाइते भएको प्रहरीले जनाएको छ।
'गाउँमा रहेको बगैँचाबाट आँप चोरेको विषयमा विवाद उत्पन्न हुँदा झडप भएको रहेछ,' प्रहरी नायब उपरीक्षक अधिकारीले भने।
घाइतेहरूको भैरहवा मेडिकल कलेज र जिल्ला अस्पताल तौलिहवामा उपचार भइरहेको प्रहरीले जनाइएको छ।
'कुटपिटमा संलग्न चार जनालाई पक्राउ गरी घटनाबारे थप अनुसन्धान भइरहेको छ', प्रहरी नायब उपरीक्षक अधिकारीले भने।
पक्राउ पर्नेहरूमा बभनीकै १९ वर्षीय मोहम्मद हुसेन मिया, २१ वर्षीय इरफान खाँ, २८ वर्षीय फैजुला रेहमान सेख र १५ वर्षीय सोयल अहमद मिया छन्।
दुई समूहका युवा लाठीसहित उत्रिएपछि प्रहरी चौकी मर्यादपुरबाट गएको प्रहरी टोलीले घटना नियन्त्रणमा लिएको थियो।
