वीर गणेशमान सिंह राष्ट्रिय टी-२० च्याम्पियनशिप अन्तर्गत कर्णाली प्रदेशले सानदार जित दर्ता गरेको छ।
प्रतियोगितामा पहिलो जित हात पार्ने क्रममा कर्णाली प्रदेशले सुदुर पश्चिम प्रदेशलाई ४ विकेटको अन्तरले पराजित गर्यो। सुदुरपश्चिम प्रदेश भने आफ्नो पहिलो खेलमा पराजित हुन पुगेको हो।
टस जितेर पहिले ब्याटिंग गर्ने निर्णय लिएको सुदुरपश्चिम प्रदेशले निर्धारित २० ओभरमा ५ विकेट गुमाएर १४३ रन बनाएको थियो।
सुदुरपश्चिमका लागि अविशेक पालले सर्वाधिक ५१ रनको योगदान गरे। यस्तै नरेन भट्टले ४७ तथा किरण ठगुन्नाले २२ रन बनाए।
कर्णाली प्रदेशको बलिङ्ग तर्फ दिनेश अधिकारीले सर्वाधिक २ विकेट लिए। यस्तै उनिश ठकुरी, दिपेन्द्र रावत र प्रकाश जैसीले समान १/१ विकेट हात पारे।
जवाफमा १४४ रनको लक्ष्य कर्णाली प्रदेशले खेल सकिन ८ बल बाँकी रहंदा ६ विकेट गुमाएर पुरा गर्यो।
कर्णालीलाई जित दिलाउने क्रममा अर्जुन घर्तीले सर्वाधिक ३७ रन बनाए। यस्तै तल्लोक्रममा ब्याटिंग गर्दै दिनेश अधिकारीले १९ बलमा अविजित ३१ रन प्रहार गरे।
खेलको प्लेयर अफ दि म्याच कर्णाली प्रदेशका दिनेश अधिकारी चुनिए। प्रतियोगिता अन्तर्गत शनिवार हुने पहिलो खेलमा सुदुरपश्चिम र गण्डकी तथा दोस्रो खेलमा कोशी प्रदेश र लुम्बिनी प्रदेश भिड्दै छन्।
बागमतीको रोमान्चक जित
दिनको पहिलो खेलमा बागमती प्रदेशले रोमान्चक जित दर्ता गरेको छ।
अन्तिम ओभरसम्म पुगेको खेलमा बागमती प्रदेशले कोशी प्रदेशलाई ७ रनको अन्तरले पराजित गर्दै प्रतियोगिताको दोस्रो जित हात पार्यो। कोशी प्रदेश भने आफ्नो पहिलो खेलमा पराजित हुन पुगेको हो।
टस हारेर पहिले ब्याटिंगको निम्तो पाएको बागमती प्रदेशले निर्धारित २० ओभरमा ८ विकेट गुमाएर १३८ रन बनाएको थियो।
लगातार अन्तरालमा विकेट गुमाएको बागमती प्रदेशले साझेदारी बनाउन नसक्दा ब्याटिंगमा जुझ्नु परेको थियो।
बागमतीका लागि ईशान पाण्डेले सर्वाधिक ३१ तथा सोनु देवकोटाले ३० रनको योगदान गरे। यस्तै गौतम केसी र रबिन जोशीले समेत समान १३/१३ रन बनाएका थिए।
कोशी प्रदेशको बलिङ्ग तर्फ सर्वन यादवले ३ विकेट तथा ज्ञानेन्द्र श्रेष्ठले २ विकेट हात पारे।
जवाफमा १३९ रनको बिजयी लक्ष्य लिएर मैदान उत्रिएको कोशीले सानदार सुरुवात गरेको थियो। कप्तान अंकित सुवेदी र मिनस थापाले पहिलो विकेटको लागि ५३ रनको साझेदारी गर्दै कोशीलाई राम्रो सुरुवात दिएका थिए।
३६ रन बनाएका अंकित र ११ रन बनाएका मिनास गरि दुवै ओपनरको विकेट पश्चात केहि समस्यामा आएको कोशी प्रदेशलाई चेजमा कायम राख्न सुजन थपलिया र सोनु अन्सारीले तेस्रो विकेटका लागी २७ रनको साझेदारी गरे।
ईशान पाण्डेले सोनुको विकेट प्राप्त गरे पश्चात ब्याटिङ्ग गर्न आएका फिर्दोश अन्सारीले सुजनसंग साझेदारी गर्दै कोशीको इनिंगलाई अघि बढाए। १४औं ओभरको अन्तिम दुई बलमा सुबास खत्रीले लगातार २ विकेट लिंदै बागमतीलाई खेलमा फर्काएका थिए।
कोशीलाई जितसम्म पुर्याउन सुजन थपलियाले एक एण्डबाट लगातार प्रयास गरे। यद्यपि १७ औं ओभरको तेस्रो बलमा ३२ रन बनाएका सुजनलाई सुभ कंसाकारले पभेलियन फर्काए पश्चात बागमती खेलमा हावी बन्यो।
४ विकेट बाँकी रहंदा २० रन आवश्यक रहेको अवस्थामा बागमतीका रिजन ढकालले १८ औं ओभरमा २ विकेट तथा राम नरेश गिरिले १९ औं ओभरमा १ विकेट लिएपछि कोशी समस्यामा आएको थियो। अन्तिम ओभरमा रिजनले शर्वन किस्कुको विकेट लिंदै बागमतीलाई रोमाञ्चक खेलमा जित दिलाए।
खेलको प्लेयर अफ दि म्याच बागमतीका ईशान पाण्डे चुनिए।
