सिद्धार्थ बैंक नेपाल प्रिमियर लिग (एनपिएल) मा लुम्बिनी लायन्सले सुरूआती दुई खेलमा राम्रो ब्याटिङ गरे पनि खराब बलिङका कारण खेल गुमाउन पर्यो।
लुम्बिनी पहिलो खेलमा विराटनगर किंग्सविरूद्ध १९१ रन जोड्दा पनि पराजित भएको थियो।
शुक्रबार पोखरा एभेन्जर्सविरूद्ध १७० जोड्दा लुम्बिनी कुनै पनि बेला सहज स्थितिमा रहेन। पोखराले लक्ष्य कुनै पनि विकेट नगुमाई १७ औं ओभर चल्दै गर्दा पूरा गरिदियो।
दुवै खेलमा राम्रो स्कोर बनाउँदा पनि पराजित भएपछि रोहितले आफ्नो टोलीको बलिङमा समस्या रहेको स्वीकार गरे। टोलीमा रहेका उपलब्ध बलरलाई खेलाउँदा राम्रो हुन नसकेको उनको बुझाइ छ।
अब कसरी बलिङको समस्या समाधान गर्नुहुन्छ? भन्ने प्रश्नमा रोहितले शुक्रबारको खेलपछि ठट्टा गर्दै भने- ‘अब बुमराहलाई (भारतका तीव्र गतिका बलर) ल्याउनु पर्छ।’
उनले लुम्बिनीले बनाएको १७० रन जितका लागि काफी भएको लागे पनि आफ्ना स्पिनरले राम्रो खेल्न नसकेको बताए। साथै उनले ६ ओभरको पावरप्लेमा आफूहरूले धेरै रन खाएको पनि बताए।
उनले पोखराका ओपनरद्वय आन्द्रेस गौस र दिनेश खरेलको ब्याटिङको पनि प्रशंसा गरे।
खेलमा रोहितले ९५ रन प्रहार गरेका थिए। अन्तिम ओभरमा पोखराका आकाश चन्द बलिङमा थिए। उनले आफूलाई शतक मन भएको बताए।
‘आकाशले फालेन के त्यस्तो बल (ठट्टा गर्दै)। राम्रो बल फ्याँकिदियो। अर्को एण्डबाट पनि राम्रो बल आइरहेको थियो,’ उनले भने।
उनले आफ्नो बलिङ योजनालाई मैदान उतार्न नसकिएको पनि बताए। यसो भनिरहँदा उनले विपक्षी ब्याटरको प्रशंसा गर्न छुटाएनन्।
‘हाम्रो बलिङ बलियो देखिएको छैन। केही न केही बाटो पत्ता लगाउनुपर्छ जस्तो लाग्छ। पाँचवटा खेल अझै छ, प्रेसर फिल भएको त छैन। अब बलिङ युनिटले स्टेपअप गर्नुपर्यो। विकेट लिनु पर्यो,’ उनले भने।
खेलमा विपक्षी ब्याटर गौसले शतक प्रहार गरेलगत्तै रोहितले उनलाई बधाई दिएका थिए। त्यसपछि कसरी चौका र छक्का हान्न सकेको भनेर गौससँग प्रश्न गरेको रोहितको भनाइ छ।
‘लङअनमा छक्का-चौका कसरी हानिरहेको छौ भनेर सोधेको थिएँ,’ रोहितले हाँस्दै भने, ‘उसले त मैले होइन मेरो ब्याटले हो भनिरहेको थियो। उसले एकदम राम्रो ब्याटिङ गर्यो। विकेटमा केही छैन भने जसरी खेलिरहेको थियो।’
