आगामी फेब्रुअरी-मार्चमा भारतमा हुने आइसिसी टी-२० विश्वकपमा नेपालले स्थान पक्का गरेपछि सबभन्दा उत्साहित सोमपाल कामी छन्।
२९ वर्षीय बलिङ अलराउन्डर सोमपालको बाल्यकाल भारतको पञ्जाबमा बितेको थियो। भारतबाट उनी क्रिकेट खेल्नका लागि भनेर नेपाल फर्किएका थिए।
सन् २०१३ को अन्त्यमा १७ वर्षको उमेरमा नेपाल आएका सोमपालले नेपाली राष्ट्रिय क्रिकेट टोलीबाट गएको १२ वर्ष लगातार खेलिरहेका छन्।
नेपाल फर्किएलगत्तै आइसिसी टी-२० विश्वकप खेल्ने अवसर पाएका सोमपालका लागि अबको चार महिना सबै ठिकठाक चल्यो भने उनले अर्को इतिहास कोर्नेछन्। उनी नेपालका लागि तेस्रो पटक टी-२० विश्वकप खेल्ने एक्लो खेलाडी बन्नेछन्।
सन् २०२४ मा अमेरिका र वेस्ट इन्डिजमा भएको आइसिसी टी-२० विश्वकप खेल्दा पनि उनले इतिहास रचेका थिए। त्यतिबेला सोमपाल दोस्रो पटक विश्वकप खेल्ने एक्ला नेपाली खेलाडी बनेका थिए।
अर्को इतिहास नजिक पुगेका सोमपाल भारतमा विश्वकप खेल्ने कुरालाई लिएर निकै उत्साहित छन्। उनका बुबा-आमा भारतमै छन्। बाल्यकालमा भारतमा खेलेका क्रिकेट अब फेरि ताजा भएर फर्कनेछन्।
भारतमा विश्वकप हुँदा नेपालबाट धेरै समर्थक जान सक्न भएकाले पनि सोमपाल भारतमा आफ्नो खेल देखाउन आतुर छन्।
सन् २०१४ मा नेपालले विश्वकपम डेब्यू गर्दा सोमपाल टोलीका सबभन्दा जुनियार खेलाडी थिए। सन् २०२६ मा नेपालले तेस्रो पटक विश्वकप खेल्दा उनै सोमपाल टोलीका सबभन्दा सिनियर खेलाडी बन्ने छन्।
उनले सन् २०१४ मा बंगलादेशमा भएको टी-२० विश्वकपमा हङकङविरूद्ध खेल्दै सोमपालले टी-२० अन्तर्राष्ट्रिय खेलमा डेब्यू गरेका थिए।
२०१४ को विश्वकपमा सोमपालले हङकङविरूद्ध २ विकेट लिँदा बंगलादेश विरूद्धको दोस्रो खेलमा विकेटविहीन बने। अफगानिस्तान विरूद्धको खेलमा उनले २ विकेट हात पार्ने क्रममा एक मेडन फ्याँकेका थिए।
यस्तै, सन् २०१८ मा नेपालले एकदिवसीय मान्यता पाउँदा महत्वपूर्ण भूमिका निर्वाह गरेका सोमपालले २०१८ मा नेदरल्यान्ड्स विरूद्धको पहिलो एकदिवसीय खेलमा पनि खेलेका थिए।
सन् २०२४ को टी-२० विश्वकप पनि सोमपाल टोलीका मुख्य खेलाडी मध्येमा एक थिए। उनले सन् २०२४ मा तीन खेलमा ३ विकेट लिए। नेदरल्यान्ड्सविरूद्ध १ विकेट लिएका सोमपालले दक्षिण अफ्रिकाविरूद्ध विकेट लिन सकेनन् भने बंगलादेशविरूद्ध २ विकेट लिए।
सोमपालले दुई संस्करणमा टी-२० विश्वकपमा कुल ६ खेल खेल्दै ७ विकेट लिएका छन्। उनी टी-२० विश्वकपमा नेपालका लागि सबभन्दा बढी खेल खेल्न खेलाडी पनि हुन्।
सोमपालले अहिलेसम्म नेपालका लागि ६४ एकदिवसीय र ८६ टी-२० अन्तर्राष्ट्रिय खेल खेलिसकेका छन्। उनले एकदिवसीय खेलमा ८४ विकेट र टी-२० मा ८१ विकेट लिइसकेका छन्। उनले एकदिवसीय खेलमा तीन अर्धशतक समेत बनाएका छन्।
१२ वर्ष नेपाली टोलीबाट खेल्दा सोमपाल अहिले भरपर्दा तीव्र गतिका बलरमात्र नभएर तल्लो क्रमको ब्याटिङमा समेत नेपाली टोलीको आशा बन्ने गरेका छन्।
टोलीमा अनुशासित र मेहनती खेलाडीको छवि बनाएका सोमपालले सन् २०१४ को फेब्रुअरीमा विश्वकप छनोटअन्तर्गत न्युजिल्यान्डमा भएको प्रतियोगितामा युएईविरूद्धको खेलमा उनले राष्ट्रिय टोलीमा डेब्यू गरेका थिए।
गुल्मीमा जन्मेका सोमपालको बल्यकाल भारतको पञ्जाबमा बितेको थियो। बुवा पञ्जावमा कामका लागि पुगेपछि सोमपाल पनि उतै गएका थिए। त्यहाँ ठूलो दु:खले क्रिकेट सिकेका सोमपाल सन् २०१३ को अन्त्यमा नेपाल आएका थिए।
क्रिकेटर अर्जुन अधिकारीको सम्पर्कमा नेपाल आएका सोमपालले पहिलो पटक नेपाल क्रिकेट फ्यान क्लबबाट खेल्ने मौका पाएका थिए। उनले फ्यान क्लबको पहिलो खेलमा डिल्लीबजार क्लबविरूद्ध खेल्दै २ विकेट लिँदा ४६ रन पनि बनाएका थिएl
फ्यान क्लबाट यु-१९ जिल्ला छनोट खेलेका सोमपालले क्षेत्रीय छनोटमा काठमाडौंबाट खेल्ने अवसर पाए। क्षेत्रीय छनोटमा उनी उत्कृष्ट खेलाडी र उत्कृष्ट ब्याट्सम्यान मात्र भएका थिए। क्षेत्रीय प्रतियोगितापछि सोमपालले काठमाडौंबाट यु-१९ राष्ट्रिय प्रतियोगिताको छनोट खेले। नुवाकोट र भक्तपुरविरूद्ध लगातार शतक प्रहार गरेपछि सोमपालको चर्चा चुलिएको थियो।
उनको शतक भलै जिल्ला स्तरीय प्रतियोगिता थियो, चर्चा राष्ट्रिय स्तरमा भयो। सोमपालको खेलबारे तत्कालीन प्रशिक्षक दासानायकेले पनि चासो देखाए।
जिल्ला छनोटमा उत्कृष्ट खेलपछि सोमपालले काठमाडौंको प्रतिनिधित्व गरेर यू-१९ राष्ट्रिय प्रतियोगिता खेले। उनले सेमिफाइनलमा जनकपुरविरूद्ध ६८ रन बनाए र ४ विकेट लिए।
वीरगञ्ज विरूद्धको फाइनलमा ३ विकेट लिएर काठमाडौंलाई च्याम्पियन बनाउन महत्वपूर्ण योगदान दिए। त्यसपछि सोमापल यु-१९ एसिया कप तथा जर्नी टु वर्ल्डका लागि घोषणा गरिएको नेपालको राष्ट्रिय टोलीमा परेका थिए।
सोमपाललाई सन् २०१४ को जर्नी टु वर्ल्ड कप क्रिकेट प्रतियोगितामा पहिलो पटक नेपाली टोलीबाट खेल्ने अवसर प्रदान गरिएको थियो।
विश्वकप छनोटको तयारीका लागि आयोजना भएको प्रतियोगिता अनौपचारिक थियो। उनले प्रतियोगितामा ४ खेलमा १० विकेट लिएका थिए। त्यही प्रतियोगिताको आधार मान्दै सन् २०१३ को डिसेम्बरमा घोषणा गरिएको राष्ट्रिय टोलीमा सोमपालले पहिलो पटक स्थान पाएका थिए।
सोमपाललाई राष्ट्रिय टोलीमा भने तीव्र गतिका बलरको रूपमा स्थान दिइएको थियो। किनकी त्यतिबेला नेपालको टोलीमा तीव्र गतिको बलिङ राम्रो थिएन। प्रशिक्षक पुबुदु दासानायकले तीव्र गतिको बलिङमा थप मेहनत गर्न सुझाव दिएको सोमपालले अहिले पनि बिर्सेका छैनन्।
सन् २०१४ जनवरी १३ मा राष्ट्रिय टोलीमा डेब्यू गर्दा सोमपालले ओपनिङ बलरको जिम्मेवारी पाएका थिए। युएई विरूद्धको सो खेलमा सोमपालले विकेट लिन भने सकेनन्। उनले ७ ओभर बलिङ गर्दा ३८ रन खर्चिएका थिए। स्कटल्यान्ड विरूद्धको दोस्रो खेलमा भने उनले ३ विकेट लिए। सो प्रतियोगितामा सोमपालले ६ खेलमा ८ विकेट लिए।
त्यसपछि सोमपालले पछाडि फर्केर हेर्नु परेको छैन। नेपाललाई डिभिजन-३ देखि एकदिवसीय मान्यता दिलाउन सोमपालले दर्जनौं पटक विपक्षी खेलाडीलाई पेभिलियन फर्काइसकेका छन्।
नेपालले पहिलो पटक टी-२० विश्वकप तथा एकदिवसीय खेल खेल्दा सोमपाल टोलीका महत्वपूर्ण सदस्य थिए।
यस्तै, गत वर्ष अमेरिका र वेस्ट इन्डिज भएको टी-२० विश्वकपमा उनी टोलीका भरपर्दा बलिङ अलराउन्डर थिए। अब सन् २०२६ मा टोलीका सबैभन्दा सिनियर खेलाडी बनेर टी-२० विश्वकप खेल्ने अभियानमा सोमपाल छन्।
1635339834.jpeg)
-1746009348.jpg)
