इंग्लिस प्रिमियर लिगमा चेल्सीले घरेलु मैदान स्टामफोर्ड ब्रिजमा शनिबार भएको खेलमा फुलह्यामलाई २-० ले हराउँदै आफ्नो अपराजित सिजनको सुरुवातलाई कायम राखेको छ।
खेलमा जोआओ पेड्रोले लगातार गोल गर्ने क्रम जारी राखे। फुलह्याम दुई विवादास्पद भिडियो असिस्टेन्ट रेफ्री निर्णयको शिकार भयो।
गत महिना ब्राइटनबाट ५५ मिलियन पाउण्डमा चेल्सी आएका स्ट्राइकर जोआओ पेड्रोले यस सिजनका पाँच खेलमा पाँचौ गोल गरे। उनले पहिलो हाफको इन्जुरी टाइममा हेड मार्फत अग्रता दिलाएका थिए। त्यसपछि एन्जो फर्नान्डेजले दोस्रो हाफमा पेनाल्टी मार्फत अर्को गोल थपेर चेल्सीको जित सुनिश्चित गरे।
तर, खेलका क्रममा रेफ्री रोबर्ट जोन्सले गरेका केही विवादास्पद निर्णयहरू चर्चामा रहे।
पहिलो विवाद २१ औं मिनेटमा आयो जब फुलह्यामका मिडफिल्डर जोश किङले गोल गरे। तर भारमा माइकल सालिसबरीले गोल हुनुअघि फुलह्यामका खेलाडी रोड्रिगो मुनिजले ट्रेभो चालोबालाई धकेलेको देखियो। रेफ्री जोन्सले पिचसाइड मनिटरमा हेरेपछि पनि भारको निर्णयलाई नै सदर गरे। तर, फुटेजमा मुनिजको चालोबामाथि सामान्य मात्रै स्पर्श भएको र त्यो प्राकृतिक चालजस्तै देखिएको थियो।
फुलह्यामका प्रशिक्षक मार्को सिल्भाले रेफ्री जोन्सको निर्णयप्रति आक्रोश व्यक्त गरे।
यससँगै चेल्सीले अन्तर्राष्ट्रिय विश्रामअघि यो महत्त्वपूर्ण जित दर्ता गर्दै तीन खेलबाट सात अंक जोड्यो।
-1746009348.jpg)
