सिल्क ग्रुपका प्रिन्स दाहाल गोलबजारमा जारी योनेक्स सनराईज १० औं पुष्पलाल स्मृती राष्ट्रिय र्यङ्किङ्ग ब्याडमिन्टन प्रतियोगिताको फाइनलमा प्रवेश गरेका छन्।
प्रिन्सले राष्ट्रिय वरीयतामा एक नम्बरमा रहेका सेनाका रत्नजित तामाङमाथि २१-१४, १५-२१ र २१-१५ को जित निकाल्दै फाइनलमा स्थान बनाएका हुन्।
प्रिन्सको रत्नमाथिको यो लगातार दोश्रो जित हो। लगातार आठ पटकका विजेता रत्नलाई प्रिन्सलेले पराजित गरेका हुन्।
यसअघि पनि प्रिन्सले चौतारामा भएको सर्वाधिक रासीको प्रतियोगितामा पनि पराजित गरेका थिए।
अब उनले उपाधिका लागि एपिएफका दिपेश धामीको सामना गर्नेछन्। धामीले सेनाका प्रफुल महर्जनलाई २१-१२, १८-२१ र २१-१२ले पराजित गरे।
राष्ट्रिय ब्याडमिन्टन संघ नेपाल र गोलबजार नगपालिका, सिराहाको संयुक्त आयोजनामा भएको प्रतियोगिताको महिला १२ वरीयताको स्पर्धामा जेशिका गुरुङ्ग फाइनल प्रवेश गरिन्।
एपिएफकी जेशिकाले भोजपुरकी पूर्वराष्ट्रिय च्याम्पियन तथा नम्बर एक खेलाडी नङ्गशल देवी तामाङ्गलाई २१-१३ र २१-१५ ले पराजित गर्दै फाइनलमा हालकी राष्ट्रिय च्याम्पियन सेनकी रशिला महर्जनको सामना गर्ने भएकी छिन्।
रशिलाले सेनाकै अमिता गिरी माथि २१-६, १८-२१ र २१-१२ को जित निकालिन्।
