राष्ट्रिय खेलकुद परिषदको त्रिपुरेश्वरस्थित कभर्डहलमा बुधबार भएको दोस्रो क्वालिफायरमा विराटनगर ब्यान्डिट्समाथि ४८-२६ को जित हासिल गर्दै काठमाडौं माभरिक्स नेपाल कबड्डी लिगको फाइनलमा प्रवेश गरेको छ।
काठमाडौंले अब शुक्रबार हुने उपाधिको खेलमा जनकपुर नाइट्सको सामना गर्नेछ। पहिलो क्वालिफायरमा विराटनगरलाई ३४-३२ ले हराउँदै जनकपुरले पहिले नै फाइनलमा आफ्नो स्थान सुरक्षित गरिसकेको थियो।
धनगढी वाइल्डक्याट्समाथि ५०-४५ को कठिन जित हासिल गर्दै काठमाडौंले दोस्रो क्वालिफायरमा आफ्नो स्थान बनाएको थियो।
काठमाडौंले बुधबार दुवै हाफमा प्रभाव जमाएको थियो।
काठमाडौंले २४ रेड अंक बनाएको थियो। काठमाडौंले ट्याकलबाट नौ अंक बनाएका थियो भने विराटनगरले केवल दुई अंक मात्र हासिल गर्न सकेको थियो। काठमाडौंले तीन अलआउटबाट छ अंक बनाएको थियो।
एस्ट्रोनिक्स म्यानेजमेन्टद्वारा आयोजित लिगमा छ शहरका टोलीबीच लिग चरणमा प्रतिस्पर्धा भएको थियो।
