यम शेर्पाको निर्देशनमा बन्न लागेको फिल्म 'कार्साङ' मा अभिनेत्री शिल्पा मास्के अनुबन्धित भएकी छन्।
यसअघि फिल्ममा दयाहाङ राई, बुद्धि तामाङ, सुरक्षा पन्त र छिरिङ शेर्पा अनुबन्धित भइसकेका छन्। छिरिङ शेर्पाले यसै फिल्मबाट डेब्यू गर्न लागेकी हुन्। फिल्ममा शिल्पा अनुबन्धित भएसँगै मुख्य कलाकारहरूको लाइनअप पुरा भएको निर्देशक शेर्पाले जानकारी दिए।
शेर्पाको यो डेब्यू निर्देशकीय फिल्म हो। फिल्ममा उनको कथा, पटकथा तथा संवाद छ। यसअघि शेर्पाले थुप्रै छोटा फिल्मको निर्देशन गरिसकेका छन्।
फिल्म 'कार्साङ' शेर्पा जातिको सामाजिक कथावस्तुमा निर्माण हुने बताइएको छ। यो फिल्म यार्सा फिल्म्सको ब्यानरमा निर्माण हुन लागेको हो।
पुरूषोत्तम प्रधानको छायांकन रहने फिल्मको केही दिनमै बाह्रबिसे नगरपालिका र भोटेकोसी गाउँपालिका विभिन्न स्थानमा छायाकंन गरिने छ।
