अर्जुन सुवेदीले निर्देशन गरेको फिल्म 'रंगेली' को पोस्टर सार्वजनिक भएको छ। सार्वजनिक पोस्टरमा अभिनेत्री मिरूना मगरलाई प्रस्तुत गरिएको छ।
फिल्ममा अभिनेत्री मिरूनाले जुनकिरी पात्रको भूमिका निर्वाह गरेकी छन्। निर्माण टिमले उनलाई जुनकिरीको रूपमा परिचित गराउँदै पोस्टर सार्वजनिक गरेका हुन्।
फिल्मका निर्देशक सुवेदीले मिरूनाले अहिलेसम्म अभिनय गरेको भन्दा भिन्न चरित्र निर्वाह गरेको कारण दर्शकलाई थप चासो हुने विश्वास व्यक्त गरे। सुवेदीकै लेखन रहेको फिल्ममा मिरूनासँगै दयाहाङ राई, अर्पण थापा, प्रविण खतिवडा, रमेश बुढाथोकीलगायत कलाकारको अभिनय छ। फिल्मलाई सुशन प्रजापतिले छायांकन गरेका छन्।
संसार चौलागाईं र रमेश भट्टराई निर्माता रहेको फिल्ममा युवक कार्की र शिव शंकर चौलागाईं सह-निर्माता छन्। फिल्मका कार्यकारी निर्माता जितेन्द्र खतिवडा र अनुजजंग थापा हुन्।
यो फिल्म अस्ट्रेलिया र अमेरिकामा प्रिमियर हुने बताइएको छ। जापान, कोरिया र हङकङमा उज्ज्वल गुरागाईं र युएनए इन्टरटेन्मेन्ट, अमेरिकामा एक्का बास्सा इन्टरटेन्मेन्ट र लाइभ एट प्रिजेन्ट तथा अस्ट्रेलियामा हट बिट्स इभेन्टसले फिल्म रिलिज गर्दैछन्।
यो फिल्म फागुन २५ गतेदेखि रिलिज हुनेछ।
