अर्जुन सुवेदीले निर्देशन गरेको फिल्म 'रंगेली' को पोस्टर सार्वजनिक भएको छ। सार्वजनिक पोस्टरमा अभिनेता अर्पण थापालाई प्रस्तुत गरिएको छ।
उनको पात्रलाई 'भगवान दादा' को रूपमा परिचय गराउँदै पोस्टर सार्वजनिक गरिएको हो। यसअघि अभिनेता दयाहाङ राई र अभिनेत्री मिरूना मगरको पात्र अनुसारका पोस्टर सार्वजनिक गरिएको थियो।
फिल्ममा अर्पणले जबरजस्त भूमिका निर्वाह गरेको निर्देशक अर्जुन सुवेदीले बताए। सुवेदीकै लेखन रहेको फिल्ममा अर्पणसँगै दयाहाङ राई, मिरूना मगर, प्रविण खतिवडा, रमेश बुढाथोकीलगायत कलाकारको अभिनय छ। फिल्मलाई सुसन प्रजापतिले छायांकन गरेका छन्।
संसार चौलागाईं र रमेश भट्टराई निर्माता रहेको फिल्ममा युवक कार्की र शिव शंकर चौलागाईं सह-निर्माता छन्। फिल्मका कार्यकारी निर्माता जितेन्द्र खतिवडा र अनुजजंग थापा हुन्।
यो फिल्म अस्ट्रेलिया र अमेरिकामा प्रिमियर हुने बताइएको छ। जापान, कोरिया र हङकङमा उज्ज्वल गुरागाईं र युएनए इन्टरटेन्मेन्ट, अमेरिकामा एक्का बास्सा इन्टरटेन्मेन्ट र लाइभ एट प्रिजेन्ट तथा अस्ट्रेलियामा हट बिट्स इभेन्टसले फिल्म रिलिज गर्दैछन्।
यो फिल्म आगामी फागुन २५ गतेदेखि रिलिज हुनेछ।
