दीपक श्रेष्ठ निर्देशित फिल्म 'पर्खि बसें तिमीलाई' को नयाँ पोस्टर सार्वजनिक गरिएको छ।
बुधबार निर्माण टिमले फिल्मको दुई पोस्टर सार्वजनिक गरेका हुन्। दुई पोस्टर मध्ये एकमा प्रेम भाव देखाइएको छ भने दोस्रोमा प्रेमले निम्त्याउने वेदना प्रस्तुत गरिएको छ।
निर्देशक श्रेष्ठले 'पर्खि बसे' मार्फत नयाँ कलाकारका रूपमा राजबल्लभ कोइराला र युना उप्रेतीलाई प्रवेश गराएका थिए। यसपटक उनले अभिनेता किरण श्रेष्ठ र अभिनेत्री रक्षा बुढाथोकीलाई डेब्यु गराउँदैछन्।
रोमान फिल्म र तपश्री फिल्म्स (सिक्किम) को संयुक्त ब्यानरमा निर्माण गरिएको फिल्ममा अनिशा रसाइली, शिव श्रेष्ठ, विल्सन विक्रम राई, सुनिता श्रेष्ठलगायत कलाकारको अभिनय छ।
राजाराम बुढाथोकी निर्माता रहेको फिल्ममा कोमल गुरुङ सह-निर्माता छन्। फिल्ममा परिच्छेद सेन, मौनता श्रेष्ठ र पुरुषोत्तम ढुंगेलको लेखन, संकल्प भुजेलको छायांकन, शम्भुजित बाँस्कोटा, दीपक शर्मा, महेश खड्का र बाबुल गिरीको संगीत, भुपेन्द्र अधिकारीको सम्पादन, मनोरञ्जन श्रेष्ठको कलर करेक्सन, रामजी लामिछाने र निशा रसाइलीको नृत्य निर्देशन रहेको छ।
यसको छायांकन नेपालसँगै सिक्किमको रमणीय दृश्यमा गरिएको छ। फिल्म काठमाडौं उपत्यकामा करण श्रेष्ठले रिच इन्टरटेनमेन्टले र मोफसलमा एफडी कम्पनीले वितरण गर्नेछन्।
यो फिल्म पुस २७ गतेदेखि प्रदर्शन हुँदैछ।
