यतिबेला हलमा अभिनेता प्रदीप खड्का अभिनीत फिल्म 'पुजार सार्की' र अभिनेत्री पूजा शर्मा अभिनीत फिल्म 'दान्भी' प्रदर्शन भइरहेका छन्।
प्रदीप र पूजाको छुट्टा छुट्टै फिल्म प्रदर्शन भएपनि उनीहरूलाई पहिचान दिलाउने फिल्म एउटै हो– प्रेमगीत।
यो फिल्मअघि प्रदीप र पूजा दुवैले अभिनय गरिसकेका थिए। तर उनीहरूका फिल्म हिट भएको थिएन। प्रदीपले 'स्केप' मा अभिनय गरेका थिए भने पूजाले 'थ्री लभर्स', 'मधुमास', 'अझै पनि', र 'चंखे शंखे पंखे' मा अभिनय गरेकी थिइन्।
आज हामी प्रदीप र पूजालाई हिट बनाउने फिल्म सिफारिस गर्दैछौं।
सुदर्शन थापाले निर्देशन गरेको फिल्ममा प्रदीप र पूजासँगै सरोज खनाल, रूपा राना, लक्ष्मी गिरी, राजाराम पौडेललगायत कलाकारको अभिनय छ।
सन् २०१६ मा प्रदर्शन भएको फिल्ममा सन्तोष सेनको लगानी छ। यो फिल्म मुस्ताङको यात्राका क्रममा भेटिएका युवा र युवतीको प्रेमकथामा आधारित छ।
