साउन १८ गते रिलिज हुने नेपाली फिल्म 'मोदीबेनी' को अफिसियल पोस्टर सार्वजनिक गरिएको छ। पोस्टरमा अभिनेत्री वर्षा सिवाकोटीलाई केन्द्रमा राखिएको छ। जसअनुसार फिल्ममा उनको भूमिका महत्त्वपूर्ण रहेको अनुमान लगाउन सकिन्छ।
पोस्टरमा अमर प्रताप श्रेष्ठ, प्रवीण खतिवडा, रेजिना उप्रेती र दिलीप केसीलाई समेत प्रस्तुत गरिएको छ।
यसअघि अमर र वर्षाको क्यारेक्टर पोस्टर सार्वजनिक भएका थिए, जसमा अमरलाई ‘एंग्री योङ म्यान’ र वर्षालाई रहस्यमय अवतारमा देखाइएको थियो।
नयाँ पोस्टरको थिम ‘सर्कल थिम’ मा रहेको छ, जसमा पोस्टरको पृष्ठभूमिमा राखिएका पुल लगायतका दृश्यहरूलाई घुमाइएको छ। रोचक र रहस्यमय कथा बोल्ने यस पोस्टरमा फिल्मको शीर्षकलाई पनि सर्कल थिममा नै राखिएको छ।
पोस्टरलाई रोयल भीमसेनले डिजाइन गरेका हुन्।
पर्वत जिल्लाको मोदीबेनी क्षेत्रमा घटेको अविश्वसनीय घटनामा आधारित रहेर बनेको फिल्म 'मोदीबेनी' लाई शंकर कोइरालाले निर्देशन गरेका हुन्। डिनेस्ट इन्टरटेनमेन्टको प्रस्तुतिमा बनेको फिल्मलाई आनन्द विक्रम क्षेत्रीले लेखेका छन्।
यसमा दिलीप के.सी. निर्माता र हरि श्रेष्ठ सह–निर्माता रहेका छन्।
उत्सव दाहालको डिओपी, भरत रेग्मीको सम्पादन रहेको फिल्मलाई रिच इन्टरटेन्मेन्टले काठमाडौं उपत्यका र एफडी कम्पनीले उपत्यका बाहिर वितरण गर्दैछन्।
