अनमोल केसी, आँचल शर्मा र जसिता गुरूङको मुख्य अभिनय रहने फिल्म 'जेरीः अन टप' को प्रदर्शन मिति तय गरिएको छ।
फिल्मलाई भ्यालेन्टाइन डेको अवसर पारेर फागुन २ गतेदेखि प्रदर्शनमा ल्याइने भएको निर्माता सरोज न्यौपानेले बताए।
निर्माण टिमले शुक्रबार वितरक फाइनल गर्दै प्रदर्शन मितिबारे छलफल गरेको थियो। 'वितरकसँग भएको छलफलमा उक्त डेट उपयुक्त लागेकोले सोही मितिमा फिल्मलाई ल्याउने घोषणा गरेका छौं,' निर्माताले न्यौपानेले भने।
फिल्मलाई काठमाडौंमा रिच इन्टरटेन्मेन्ट र काठमाडौं बाहिर एफडी कम्पनिले वितरण गर्ने भएका छन्।
त्रिकोणात्मक प्रेमकथामा निर्माण हुन लागेको यो फिल्मलाई 'फर्की फर्की' फ्रेम्ड निर्देशक सुयोग गुरूङले निर्देशन गर्दैछन्। हेमराज बिसीको लेखन रहेको फिल्मको निर्मातामा सरोज र दीपक भण्डारी छन्।
क्रियटिभ प्रोड्युसरका रूपमा रोहित अधिकारी छन्।
यो फिल्ममा अनमोल र आँचलले पहिलोपटक सहकार्य गर्न लागेका हुन्। अनमोल र जसिताले भने यसअघि ‘फर्की फर्की’ मा सहकार्य गरेका थिए।
९ वर्षअघि प्रदर्शनमा आएको सफल फिल्म ‘जेरी’ को दोस्रो शृंखलाका रूपमा ‘जेरीः अनटप’ निर्माण हुन लागेको हो।
साउन २ गतेदेखि छायांकन सुरू गर्ने तयारी रहेको फिल्मलाई काठमाडौं, लुक्ला, मुस्ताङ लगायतका स्थानमा खिचिने जनाइएको छ।
