टेलिभिजन कमेडी शो 'कमेडी दरबार' एक महिना पछिदेखि प्रसारणमा आउने भएको छ।
यसअघि असार दोस्रो साताबाट प्रसारणमा ल्याउने तयारी गरिएको शो साउन १८ गतेदेखि प्रिमियर हुने तय भएको निर्देशक बिक्की अगरवालले बताए। 'सेटलाई आकर्षण बनाउन लागिपर्नुका साथै अन्य केही प्राविधिक कारणले थोरै ढिलाइ हुन पुग्यो,' बिक्कीले भने, 'अब साउन ९ देखि सुटिङ सुरू गरेर १८ गतेदेखि दर्शकमाझ ल्याउने भएका छौं।'
बिक्की र श्रद्धा प्रसाईंको निर्देशन रहने शोमा अभिनेत्री गौरी मल्ल, अभिनेता विजय बराल, अभिनेत्री नम्रता सापकोटा, मोडल पवित्रा साँकी (मिस पबि), कमेडियनहरू सुन्दर खनाल, हिमेश पन्त, पवन खतिवडा, उत्सव सापकोटा, गायक सिडी विजय अधिकारी र भिजे सुजिता श्रेष्ठ देखिँदैछन्।
पूर्व मिस नेपाल नम्रता श्रेष्ठले शोलाई होस्ट गर्दैछिन्।
शुक्रबार राती ९ बजे शो प्रसारणमा आउने छ। प्राइम टाइम टेलिभिजन र ओएसआर रियालिटी युट्युबमा शो ल्याउन लागिएको छ। यसको प्रोमो यसअघि सार्वजनिक भइसकेको छ।
'कमेडी दरबार' पारिवारिक कमेडी शो हुने बिक्कीले बताएका छन्। 'कमेडियन र नन कमेडियनहरूलाई लिएर आइरहेका भन्दा फरक फम्र्याटमा शो ल्याउँदैछ। पक्कै दर्शकले रूचाउनुहुनेछ,' बिक्कीले भने।
