म्युजिक भिडिओमा रूचाइएकी मोडल सनिशा भट्टराईले नयाँ फिल्म साइन गरेकी छन्।
अभिनेता राजेश हमालको कमब्याक फिल्म 'नरसिंहाः अवतार' मा सनिशा अनुबन्धित भएकी हुन्।
यो फिल्ममा उनलाई शीर्षमध्येको भूमिकामा लिइएको निर्देशक दिवाकर भट्टराईले बताए। फिल्ममा उनको भूमिका कस्तो हुने भन्नेबारे खुलाइएको छैन।
गत साता थिम पोस्टर सार्वजनिक गर्दै यो फिल्मको निर्माण घोषणा गरिएको थियो। क्रिएटिभ सिने आर्टको प्रस्तुति रहने फिल्मलाई एक्सनप्रधान बनाउने तयारी छ।
निर्देशक दिवाकरका अनुसार फिल्ममा राजेश हमाललाई नयाँ लुक्समा ल्याउने तयारी छ। यसको लगानी तीन करोडभन्दा माथि हुने बताइएको छ।
'नरसिंहा अवतार' सनिशाको भने दोस्रो फिचर फिल्म हुनेछ। उनले अभिनय गरेको पहिलो फिल्म '१२ गाउँ' दसैंमा रिलिज हुँदैछ।
सनिशा आफ्नो पहिलो म्युजिक भिडिओ ‘ए होर माया’ बाटै परिचित बन्न पुगेकी थिइन्।
