टेलिभिजन कमेडी शो 'कमेडी दरबार' यही भदौ दोस्रो सातादेखि प्रसारणमा आउने भएको छ।
केही महिना अघिदेखि तयारी थालिएको शो भदौ १४ गते शुक्रबारदेखि प्रिमियर हुने भएको निर्देशक बिक्की अगरवालले जानकारी दिए।
बिक्की र श्रद्धा प्रसाईंको निर्देशन रहने शो प्रत्येक शुक्रबार राती ९ बजे प्राइम टेलिभिजन र ओएसआर रियालिटी युट्युबमा स्ट्रिमिङ हुनेछ।
पहिलो एपिसोडको प्रोमो समेत युट्युबमा सार्वजनिक भइसकेको छ। यो एपिसोडमा अभिनेता दयाहाङ राई र अभिनेत्री रेखा थापा अतिथिका रूपमा छन्।
शोमा अभिनेत्री गौरी मल्ल, अभिनेता विजय बराल, गायक सिडी विजय अधिकारी, अभिनेत्री नम्रता सापकोटा, मोडल पवित्रा साँकी (मिस पबि), कमेडियनहरू सुन्दर खनाल, हिमेश पन्त, पवन खतिवडा, उत्सव सापकोटा, विकास अर्याल र भिजे सुजिता श्रेष्ठ देखिँदैछन्।
होस्टका रूपमा पूर्व मिस नेपाल नम्रता श्रेष्ठ छिन्। 'हाँसोको बेग्लै अवतार' भनिएको ‘कमेडी दरबार' पारिवारिक कमेडी शो हुने बिक्कीले बताएका छन्। उनी आफू भने यो शोमा देखिने छैनन्।
कमेडियन र नन कमेडियनहरूलाई लिएर आइरहेका भन्दा फरक फम्र्याटमा आउन लागेको 'कमेडी दरबार' लाई दर्शकले रूचाउने टिमको विश्वास छ।
