प्रदीप खड्का र क्रिस्टिना गुरूङको शीर्ष अभिनय रहेको फिल्म 'प्रेम गीत ३' नेपाली ओटीटी प्लेटफर्ममा रिलिज भएको छ।
फिल्मलाई हालै 'सिनेमाघर एप' मा रिलिज गरिएको हो।
यो फिल्म दुई वर्षअघिको दसैं छेकोमा नेपाली र हिन्दी भाषामा नेपाल र भारतमा एकसाथ सार्वजनिक प्रदर्शनमा आएको थियो।
फिल्ममा प्रदीप र क्रिस्टिनासहित शिव श्रेष्ठ, मनिष राउत, अनुभव रेग्मी, सम्बृद्धि शाही ठकुरी, सुनील थापा, सन्तोष सेन, माओत्से गुरूङ, पुष्कर कार्की, प्रेम पुरी, लक्ष्मी वर्देवा, योगिशा खत्री लगायत कलाकारहरूको अभिनय छ।
फिल्मलाई छेतेन गुरूङ र सन्तोष सेनले संयुक्त निर्देशन गरेका छन्।
'प्रेम गीत ३' रिलिजसँगै सिनेमाघर एपले नयाँ अपडेट पनि ल्याएको छ, जसअनुसार यसअघि एन्ड्रोइड र आइओएस मोबाइल तथा स्मार्ट टिभी प्लेटफर्महरूमा रहेकोमा अब फिल्महरू ल्यापटप र डेस्कटपमा वेब ब्राउजरमार्फत पनि हेर्न सकिनेछ। साथै, फोनपे क्युआर कोड मार्फत नेपाल र भारतबाट सजिलै भुक्तानी गर्न मिल्ने सुविधा पनि उपलब्ध हुनेछ।
नेपाली भाषा विकल्प र २४ घण्टा प्राविधिक सहयोगको सुविधा पनि छिट्टै उपलब्ध गराइने सिनेमाघरका सिइओ सागर खरेलले बताए।
