अनमोल केसीको मुख्य अभिनय रहेको फिल्म 'जेरीः अन टप' को टिजरले राम्रो चर्चा पाइरहेको छ। गत मंगलबार रिलिज टिजरले सुरूका दिनबाटै चर्चा पाइरहेको हो।
टिजरले शुक्रबार दिउँसोसम्म युट्युबमा १५ लाख हाराहारी भ्युज पाएको छ। नेपालसहित थुप्रै देशमा फिल्म 'मुभिज ट्रेन्डिङ चार्ड' मा परेको छ। नेपालमा यो फिल्म 'ट्रेन्डिङ मुभिज ट्रेलर्स' को सबभन्दा शीर्ष स्थानमा छ। त्यस्तै, अस्ट्रेलिया, हङकङ, जापान, कुवेत, मलेसिया, माल्टा, पोर्चुगल, कतार, रोमानिया लगायतका देशमा समेत फिल्मको टिजर ट्रेन्डिङमा छ। यसको अर्थ विदेशमा रहेका नेपालीमाझ पनि फिल्मको टिजर रूचाइएको छ।
युट्युबले गत महिनादेखि 'ट्रेन्डिङ' पृष्ठ हटाएको छ। यो पृष्ठ हटाएपछि 'युट्युब चार्टस्' अन्तर्गत विभिन्न विधाका लोकप्रिय सामाग्रीहरू हेर्न पाइने बनाइएको छ। जसअन्तर्गत 'जेरीः अन टप' को टिजर नेपालसहित विभिन्न देशमा उक्त चार्टस्मा पर्न सफल भएको हो।
टिजर रूचाइएसँगै अभिनेता अनमोल केसीले सामाजिक सञ्जालमार्फत दर्शकहरूलाई धन्यवाद दिँदै खुसी समेत साटेका छन्।
'जेरीः अन टप' को टिजरमा विश्वकै सर्वोच्च शिखर सगरमाथा आरोहण र यात्राको क्रममा हुने प्रेमकथा देखाइएको छ।
टिजरमा देखाइएका सुन्दर हिमाली दृश्यहरू र कलाकारहरूको अभिनयले पनि दर्शकमाझ कौतुहलता र उत्साह थपेको देखिन्छ।
सुयोग गुरूङको निर्देशनमा बनेको 'जेरीः अन टप' मा अनमोलका साथमा आँचल शर्मा, जसिता गुरूङ, भुवन केसी, केदार घिमिरे (माग्ने बुढा), उषा खड्गी लगायतको अभिनय छ।
अनन्या फिल्मस्को ब्यानरमा बनेको फिल्मको प्रस्तुतकर्ता सरोज न्यौपाने हुन्। निर्मातामा भविष्य खड्का, रोविन शेरचन, रामकृष्ण श्रेष्ठ, दीपक भण्डारी र अनन्या न्यौपाने छन्। फिल्मको कथा हेमराज बिसीले लेखेका हुन् भने पटकथा विश्वास तिमल्सिनाले तयार पारेका हुन्।
'जेरीः अन टप' तिहारको अवसर पारेर आगामी असोज ३१ गतेदेखि प्रदर्शनमा आउने तयारीमा छ।
-1755241369.jpg)
-1746009348.jpg)
