अभिनेता राजेश हमालको कमब्याक फिल्म 'नरसिंहाः अवतार' को शुभमुहूर्त गरिएको छ।
बिहीबार काठमाडौंको एनएफडिसी स्टुडियो बालाजुमा आयोजित मुहूर्त समारोहमा निर्माता नरेन्द्र महर्जनले क्ल्याप हाने भने निर्माता तथा वितरक छविराज ओझाले नरिवल फुटाए। शुभमुहूर्तमा कलाकारहरु राजेश हमाल, राज कटुवाल, नीति शाह, सनिशा भट्टराई, अर्जुन श्रेष्ठसहित निर्माण टिमको उपस्थिति रह्यो।
निर्देशक दिवाकर भट्टराईले मुहूर्तसँगै फिल्मको सुटिङ पनि सुरू भएको जानकारी दिए। उनले यो फिल्म आफ्नो लागि निकै चुनौतीपूर्ण रहेको पनि बताए।
'राजेश दाइले धेरै स्क्रिप्टहरू नगरेर मेरो स्क्रिप्ट गर्नु नै मेरो लागि च्यालेन्ज हो। किनकि राजेश दाइलाई कन्भिन्स गर्नलाई नै मलाई ३ महिना लागेको थियो,' उनले भने।
निर्माता महर्जनले यो फिल्म फरक तरिकाले निर्माण हुने भएकोले आफू निर्माणमा जोडिएको बताए। अभिनेता हमालले यो फिल्मको स्टोरी आफूले सोँचेको भन्दा फरक पाएको र टिमअप राम्रो भएको कारण पुनः फिल्ममा फर्किएको बताए।
अभिनेता राज कटुवालले आफूले सानैदेखी नै राजेश हमालको पोस्टरहरू कलेक्सन गर्दै आएको र अहिले संगै फिल्ममा सहकार्य गर्न पाउँदा आफू निकै उत्साहित रहेको बताए।
अभिनेत्री नीति शाहले आफूलाई राजेश हमालले पहिल्यैदेखी फिल्म प्रोत्साहन गर्ने गरेको र अहिले आएर सँगै काम गर्न पाउँदा एकदमै खुसी लागेको बताइन्।
अर्की अभिनेत्री सनिशा भट्टराईले पनि राजेश हमालसँग एउटै फिल्ममा काम गर्न पाउँदा उत्साहित रहेको बताइन्।
यो फिल्मबाट अभिनेता राजेश हमालले ७ वर्षपछि कमब्याक गर्न लागेका हुन्। उनले यो फिल्मका लागि केही समयदेखी आफ्नो लुक बनाइरहेका छन्। त्यस्तै, अभिनेता सरोज खनाल र हमाल ३० वर्षपछि एकसाथ यो फिल्ममा काम गर्दैछन्।
एक्सन तथा सोसल ड्रामामा बन्न लागेको यो फिल्ममा दीपा शाही, प्रशान्त ताम्राकार, नीर शाह, रमेश चन्द सोडारी, प्रकाश कुँवर लगायत कलाकारहरूको समेत अभिनय रहनेछ। क्रिएटिभ सिने आर्टको प्रस्तुति रहेको फिल्मका द्वन्द्व निर्देशक चन्द्र पन्त हुन्।
यो फिल्मलाई निर्माता नरेन्द्र महर्जन, पर्शुराम बस्नेत र धुर्ब न्यौपानेले संयुक्त रूपमा निर्माण गर्दैछन्।
आगामी फागुन १४ गते शिवरात्रिलाई प्रदर्शन मिति घोषणा गरिएको फिल्मलाई एप्पल इन्टरटेन्मेन्ट, एफडी कम्पनी र रिच इन्टरटेन्मेन्टले संयुक्त रूपमा वितरण गर्नेछन्।
