तिहारको अवसर पारेर रिलिज हुन लागेको फिल्म 'एक्टरः टेक वान' को टिजर सार्वजनिक गरिएको छ।
शुक्रबार सार्वजनिक १ मिनेट ३२ सेकेन्डको टिजरले फिल्मको कथावस्तुबारे केही संकेत गर्छ।
टिजरमा अभिनेता प्रदीप खड्का घाइते अवस्थामा पानीभित्र तैरिरहेको देखिन्छन्। त्योसँगै कसैको भ्वाइसओभर सुनिन्छ। त्यसपछि प्रदीप गीटार लिएर गाउँदै गरेको देखिन्छन्। यसबाट उनी फिल्ममा गायक वा गायक बन्न संघर्ष गरिरहेको पात्रको भूमिकामा रहेको संकेत पाइन्छ।
दुई अभिनेत्रीहरू आना शर्मा र दिव्या रायमाझीसँग प्रदीपको निकटतालाई टिजरमा देखाइएको छ। यसबाट फिल्म त्रिकोणात्मक प्रेमकथामा बनेको संकेत पाइन्छ।
टिजरमा प्रदीपको भ्वाइसओभर छ– सपना देख्न हैसियत होइन्, हिम्मत चाहिन्छ। अनि पूरा गर्न आत्मविश्वास। दिस इज माइ स्टोरी।
यसपछि उनी फेरि घाइते अवस्थामा अर्का अभिनेता राजबल्लभ कोइरालाको नियन्त्रणमा देखिएका छन्।
अन्य केही कलाकारहरूलाई भने टिजरमा प्रस्तुत गरिएको छैन।
राजन भुसालको निर्देशन रहेको यो फिल्ममा दिव्य देव, सुशील सिटौला, उषा रजक, सिर्जना अधिकारी, अनोज पाण्डे, बादल भट्ट, प्रदीप कुमार चौधरी र देवेन्द्र नेपालको पनि अभिनय छ।
दीलिप रायमाझीकी छोरी दिव्याको ‘एक्टर’ पहिलो फिल्म हो। राजबल्लभले यो फिल्मबाट लामो समयपछि कमब्याक गरेका हुन्।
थम्मन कुमार भण्डारी निर्माता रहेको यो फिल्मलाई आकाश बराल र राजन भुसालले संयुक्त रूपमा लेखेका हुन्। अदृत फिल्मस् र मोती फिल्मस्को संयुक्त प्रस्तुतिमा फिल्म बनेको हो। अनिश भुसाल यसको सह–निर्माता छन् भने मोती कार्की क्रियटिभ प्रोड्युसर हुन्।
फिल्म कार्तिक १५ (लक्ष्मी पूजा) मा रिलिज हुनेछ।
