फिल्म 'छक्का पञ्जा ५' का शीर्ष तीनजना बाहेक अरू कलाकारबारे खुलाइएको छैन।
दीपकराज गिरी, केदार घिमिरे र वर्षा शिवाकोटी बाहेकका कलाकारलाई अहिलेसम्म लुकाइएको हो।
फिल्ममा समावेश दुई गीत यसअघि सार्वजनिक छन्। दुवै गीतले चर्चा पाइरहेका छन्। एक गीतमा दीपाश्री निरौला पनि फिचर्ड छिन्। उनी गीतमा मात्रै हो वा फिल्ममा छिन् भन्नेबारे पनि जानकारी दिइएको छैन।
सोही मितिमा रिलिज हुने अन्य दुई फिल्मको टिजर र ट्रेलर सार्वजनिक भइसकेका छन्। 'छक्का पञ्जा ५' को भने टिजर र ट्रेलर रिलिज गरिएको छैन।
फिल्म रिलिज हुन ६ दिन मात्र बाँकी रहँदा पनि ट्रेलर नआएपछि कतै सार्वजनिक नगरिने त होइन् भन्ने आशंका समेत दर्शकमा देखिन्छ।
सेतोपाटीसँगको कुराकानीमा दीपकराजले ट्रेलर रिलिज गर्न अझै एक/दुई दिन लाग्ने बताए।
'टिजर त ल्याउँदैनौं। ट्रेलर एक/दुई दिनमा रिलिज गर्छौं। अहिले त्यसकै तयारीमा छौं,' उनले भने।
'छक्का पञ्जा ५' को छायांकनदेखि अहिलेसम्म भौतिकरुपमा पत्रकार सम्मेलन समेत आयोजना गरिएको छैन। ट्रेलरमा तीनजना बाहेकका कलाकार देखिन्छन् वा देखिँदैनन् त्यो पनि चासोको विषय छ।
'छक्का पञ्जा ५' लाई दीपाश्री निरौलाले निर्देशन गरेकी हुन्। फूलपातीको दिन आगामी बिहीबार फिल्म रिलिज हुँदैछ।
