निर्देशक तुलसी घिमिरेको आगामी फिल्म 'पहाड' को एक गीतमा अभिनेता विपिन कार्कीले आफ्नो स्वर दिएका छन्।
आइतबार काठमाडौंको महाराजगञ्जमा रहेको एक स्टुडिओमा विपिनले पहाडको एक गीतमा र्याप गाएका हुन्। यो गीतमा वरिष्ठ संगीतकार रञ्जित गजमेरको संगीत छ।
गीतलाई निर्देशक घिमिरेले लेखेका हुन। घिमिरेका अनुसार यो गीतमा भारती घिमिरे र अन्य एक गायकको पनि स्वर रहनेछ। फिल्ममा चार वटा गीत रहनेछन्।
तिहारलगत्तै छायाँकनमा निस्किने 'पहाड' मा विपिन कार्कीसहित वरिष्ठ अभिनेता मदनकृष्ण श्रेष्ठ, सुनील थापा लगायत कलाकारहरूको शीर्ष अभिनय रहनेछ।
५० प्रतिशत नेपालका विभिन्न पहाडी भेगमा छायाँकन हुने यस फिल्मको बाँकी ५० प्रतिशत छायाँकन भने मुम्बइमा हुनेछ। प्रि–प्रोडक्सनको अन्तिम चरणमा रहेका निर्देशक घिमिरेलाई प्रोडक्सन डिजाइनर भएर जेठी छोरी भावनाले सघाइरहेकी छिन्।
'मैले पहिले छड्के फिल्ममा पनि गीत गाएको थिए। तर वर्षौ पछि फेरि गीत गाउँदा अझै मज्जा आयो। हिन्दी र नेपाली शब्द मिसाइएको गीतको लिरिक्स सुन्दा कठिन होला कि जस्तो लागेको थियो तर गाउँदै जाँदा सजिलै गाएँ,' गीत रेकर्डिङपश्चात विपिनले भने।
निर्देशक तुलसी घिमिरेले ७ वर्षपछि 'पहाड' मार्फत निर्देशनमा कमब्याक गर्न लागेका हुन्।
बढ्दो बसाइँसराइले दिनदिनै रित्तिँदै गएको पहाडी भूगोलको कथामा फिल्म बनाउन लागेको घिमिरेले बताए।
'कुसुमे रुमाल, लाहुरे, चिनो, दक्षिणा, देवता, बलिदान, दर्पण छायाँ' जस्ता हिट र यादगार फिल्म दिएका घिमिरे निर्देशित पछिल्लो फिल्म 'दर्पण छायाँ २' हो। जुन २०७३ सालमा रिलिज भएको थियो।
