हरर कमेडी फिल्म 'फिरफिरे फिरिरी' को ट्रेलर सार्वजनिक गरिएको छ।
बिहीबार काठमाडौंमा एक कार्यक्रमकाबीच सार्वजनिक ट्रेलरले फिल्मको कथावस्तुबारे केही जानकारी दिन्छ।
२ मिनेट ४२ सेकेन्डको ट्रेलरमा नेपाली समाजमा रहेको अन्धविश्वास, त्यसको जगमा टेकेर केही फटाह व्यक्तिले लिने गलत फाइदा, विपरीतलिंगीप्रतिको आकर्षण र रहस्यलाई देखाउन खोजिएको छ। गाउँघरमै बसेर विभिन्न पेशा अंगालेका चार युवकहरूको जीवनमा अचानक एक युवतीको आगमनपछि उत्पन्न परिस्थितिलाई हास्य र रहस्यमय शैलीमा देखाइएको छ।
फिल्मबाट सन्दीप श्रेष्ठ र भावना उप्रेतीले अभिनयमा डेब्यु गरेका छन् भने रविना केसी, पिटर प्रिन्स, मनोज कुमार अधिकारी, शंकर सेढाई, सूर्यमान लिम्बू, पुष्प अवस्थी लगायत कलाकारहरूको पनि अभिनय छ।
नबिन भट्टको निर्देशनमा तयार फिल्मको स्क्रिप्ट निर्देशक भट्ट र सन्दीप श्रेष्ठले तयार पारेका हुन्।
मनोज कुमार अधिकारी फिल्मका निर्माता हुन्। उनी १५ वर्षपछि निर्माणमा फर्किएका हुन्। उनले यसअघि 'नौ डाँडा पारी' र 'मंगलसूत्र' फिल्म निर्माण गरेका थिए।
नितिश पुन सह–निर्माता रहेको फिल्ममा जितु तामाङको छायांकन तथा अनन्त घिमिरेको सम्पादन छ। बिन्दबासिनी क्रियसनको ब्यानरमा निर्माण गरिएको फिल्मलाई देशभर आरआर फिल्म्सले वितरण गर्नेछ। फिल्मको डिजिटल अधिकार म्युजिक नेपालले लिएको छ।
फिल्म छठ पर्वको दिन पारेर कात्तिक २२ गतेबाट प्रदर्शनमा आउने तयारीमा छ।
