अस्ट्रेलियामा नेपाली विद्यार्थीको संघर्ष र घर परिवारको सम्झनालाई झल्काउने गरी 'म आउँदै छु' म्युजिक भिडिओ सार्वजनिक भएको छ।
अस्ट्रेलियामा कार्यरत इन्जिनियर उत्सव लामिछानेको रचना तथा स्वरमा रहेको म्युजिक भिडिओमा अस्ट्रेलियामा नेपाली विद्यार्थीको व्यस्त दैनिकी र समस्यालाई देखाउने प्रयास गरिएको छ।
कोबिद बज्रले संगीत भरेको उक्त गीतको छायांकन र सम्पादन बिदुर दाहालले गरेका हुन् भने भिडिओको मुख्य पात्रको रूपमा आविष्कार शर्माले भूमिका निभाएका छन्।
भिडिओको निर्देशन भने लामिछानेले नै गरेका हुन्।
अस्ट्रेलिया जाने प्रत्येक नेपाली विद्यार्थी पढाई सकेर घर फर्किन चाहने भए पनि समयसँगै उसका बाध्यताहरू फेरिने अनि नेपाल फर्किन नसकेको यथार्थलाई भिडिओमा देखाइएको लामिछानेले सेतोपाटीलाई बताए।
