बाल विवाह तथा महिला हिंसा निरूत्साहित गर्ने उद्देश्यले निर्माण गरिएको फिल्म 'जुना' को फर्स्टलुक पोस्टर सार्वजनिक भएको छ।
बुधबार सार्वजनिक गरिएको पोस्टरमा फिल्मकी मुख्य कलाकार अस्मिता ढकाललाई प्रस्तुत गरिएको छ। अस्मितालाई ग्रामीण पहिरनमा देख्न सकिन्छ। पोस्टर राकेश दाहालले डिजाइन गरेका हुन्।
जीवन सेञ्चुरीले निर्देशन गरेको फिल्ममा अस्मिता ढकाल, कृष्णप्रसाद धिताल, देशभक्त खनाल, रश्मी भट्ट, कमल बोहोरा, अस्मिता बस्नेत, खगेन्द्र न्यौपाने, विकास आनन्द, इन्द्र बिके, केशव अधिकारीलगायत कलाकारको अभिनय छ।
गोदावरी फिल्म प्रोडक्सन एण्ड रिसर्च सेन्टर प्रालिको ब्यानरमा बनेको फिल्ममा दीपकप्रसाद घिमिरेको लगानी छ। पर्वतको सालिजा ओख्रेनीमा छायांकन गरिएको फिल्ममा राजबहादुर सानेको कथा, बीबी अनुरागी र रमेश सेञ्चुरीको संगीत, जीवन सेञ्चुरी र भीमबहादुर पौडेलको शब्द, अञ्जु पन्त, पूर्णकला बिसी र यदुराई लकान्द्रीको स्वर र रामेश्वर हुमागाईंको डिओपी छ।
यो फिल्म माघ २५ गतेदेखि रिलिज हुनेछ।
