बाल विवाहको पीडा देखाइएको फिल्म 'जुनाः एक व्यथा' को ट्रेलर सार्वजनिक गरिएको छ।
बालिकाको भूमिकामा देखिएकी अस्मिता ढकालको विवाहदेखि गर्भवती अवस्थासम्मको पीडालाई ट्रेलरमा देखाइएको छ। केटी माग्न गएको दृश्यदेखि सुरू भएको ट्रेलरमा विवाहपछि बालिकालाई श्रीमान र सासुले दिएको दुःख र पीडालाई देखाइएको छ।
समग्रमा ट्रेलर मर्मस्पर्शी छ। बाल विवाह गरेपछि एउटा बालिकाको जीवनमा कस्तोसम्म पीडा र दुःखका दिन आउन सक्छन् भन्ने कुरा ट्रेलरमा देखाइएको छ।
छोरीलाई विवाह गरेपछि उसका बाबुआमाको छोरीप्रतिको पीरलाई पनि ट्रेलरमा समेटिएको छ।
ट्रेलरमा अस्मितासँगै कृष्णप्रसाद धिताल, देशभक्त खनाल, रश्मी भट्ट, अनिता बस्नेत, कमल बोहोरा लगायतका कलाकारहरू छन्।
गोदावरी फिल्म प्रोडक्सन एण्ड रिसर्च प्रालिको ब्यानरमा निर्माण भएको 'जुनाः एक व्यथा' लाई जीवन सेञ्चुरीले निर्देशन गरेका हुन्। निर्देशक सेञ्चुरीले फिल्मले नेपाली समाजमा व्याप्त महिला हिंसा, बाल विवाह, अनमेल विवाह, बहुविवाह, बलात्कार र छाउपडी प्रथाजस्ता कु–ुप्रथालाई अन्त्य गराउन समाजमा चेतना फैलाउन प्रेरित गर्ने बताए।
निर्माता दीपकप्रसाद घिमिरेले फिल्ममा वास्तविकता भएकाले दर्शकलाई छुने बताए।
फिल्ममा राजबहादुर सानेको कथा, बीबी अनुरागी र रमेश सेञ्चुरीको संगीत, जीवन सेञ्चुरी र भीमबहादुर पौडेलको शब्द, अञ्जु पन्त, पूर्णकला बिसी र यदुराई लकान्द्रीको स्वर र रामेश्वर हुमागाईंको डिओपी छ।
फिल्म यही माघ २५ गते रिलिज हुने तयारीमा छ।
