गायिका एलिना चौहानले आफूहरू दुवैको सल्लाह र परिवारसँग छलफल गरेरै सम्बन्धविच्छेद गर्ने निर्णय लिएको बताएकी छन्।
काठमाडौं जिल्ला अदालतमा पति विष्णु सापकोटासँग सम्बन्धविच्छेदको मुद्दा दायर गरेको भोलिपल्ट शनिबार फेसबुकमा भिडिओ सेयर गर्दै एलिनाले उक्त कुरा बताएकी हुन्।
उनले भनेकी छन्, 'दुई जनाले सल्लाह गरेर, परिवारहरूबीच कुरा भएरै निर्णय लिएको कुरा हो। कतिपय कुरा इच्छा भन्दा पनि गर्नैपर्ने जरूरी हुँदोरहेछ। मनमुटाव हुँदाहुँदै पछि ठूलो दुर्घटना भयो भने झन् नराम्रो हुन्छ।'
उनले कसैले पनि बिहे डिभोर्स हुन्छ भनेर नगर्ने बताउँदै भनेकी छन्, 'बिहे सात जुनीसम्म हुन्छ भनेर गरेको हुन्छ। कुनै पनि बाबुआमाले मुटु फुटाएर कन्यादान दिएकी छोरीको डिभोर्स होस् भन्ने चाहँदैनन्।'
उनले विवाह गर्नु आफूहरूको हतारको निर्णय भएको बताएकी छन्। उनले प्रेमसम्बन्ध हुँदा पनि आफूहरूबीच धेरै खटपट हुने उल्लेख गरेकी छन्।
एलिनाले भिडिओमा भनेकी छन्, 'मैले सहन्छु, चुप लाग्छु, एक न एक दिन त ठीक भैहाल्छ भनेर सोचेँ। उहाँले पनि यत्तिको केटीसँग मेरो जिन्दगी चल्छ भनेर मसँग विवाह गर्नुभयो। तर, समय बित्दै जाँदा मैले सहन सकिनँ।'
आफूले माया गरेको मान्छेलाई गाली गर्दा आफूलाई पनि पीडा हुने भन्दै पतिलाई नराम्रो नभन्न उनले आग्रह गरेकी छन्।
अनुभवहरूबाट सिकेर नयाँ जिन्दगी सुरूआत गर्न चाहेको उनले बताएकी छन्। त्यसमा सहयोग गर्न नसके पनि बाधा नपुर्याउन उनको आग्रह छ।
झापाकी एलिनाले गत वैशाखमा अस्ट्रेलियामा व्यवसाय गर्दै आएका बागलुङका विष्णु सापकोटासँग विवाह गरेकी थिइन्।
विवाहको एक महिनापछि एलिना श्रीमानसँगै अस्ट्रेलिया गएर केही महिना बसिन्। दसैंअघि नेपाल फर्किएसँगै उनले रेकर्डिङ र स्टेज कार्यक्रमलाई निरन्तरता दिइरहेकी छन्।
