फ्राइडे रिलिज अन्तर्गत फिल्म 'महाभोज' देशभरका फिल्म हलहरूमा प्रदर्शनमा आएको छ।
दिनेश राउत निर्देशित फिल्म करिब २ सय शोसहित देशव्यापी प्रदर्शनमा आएको हो।
दयाहाङ राई, आर्यन सिग्देल, खगेन्द्र लामिछाने, अञ्जना बराइली, मलिका महत, र गौमाया गुरूङको मुख्य भूमिका रहेको फिल्मले सहकारीमा जम्मा गरेको रकम अपचलनको कथा भन्छ।
एक बैंक ऋण प्रबन्धक, जसलाई पैसाको असाध्यै आवश्यकता छ। उसले आफ्नो बुबासँग पैसा माग्छ। तर उसले थाहा पाउँछ कि बुबाको कडा परिश्रमले कमाएको बचत एक भ्रष्ट सहकारी र व्यक्तिहरूको समूहले आफ्नो फाइदाको लागि प्रयोग गरेको छ। न्याय खोज्न दृढ संकल्पित उसले अपराधीहरूलाई पर्दाफास गर्ने र आफ्नो बुबाको पैसा फिर्ता लिन अगाडि बढ्छ।
यो फिल्ममा काठमाडौंसहित पोखरा, बुटवल, विराटनगर र धरानमा प्रिमियर शो गरिएको थियो, जहाँ सहभागी दर्शकहरूले फिल्मप्रति निकै उत्साह देखाएका छन्।
'महाभोज' क्लक वर्क क्रियशन र पिक्चर फ्रेमको संयुक्त प्रस्तुतिमा बनेको फिल्म हो । यसका निर्माता हिमाल कडरिया हुन्।
सेतोपाटीमा केही दिनअघि यो फिल्मका कलाकारहरू आर्यन सिग्देल, खगेन्द्र लामिछाने, अञ्जना बराइली र मलिका महतबीच भिडिओ कुराकानी भएको थियो। हेर्नुहोस् उक्त कुराकानी—
