फिल्म 'मिरमिरे' को छायांकन शनिबारदेखि सुरू गरिएको छ।
एक हप्ता वर्कसपमा बसेको निर्माण टिमले काभ्रेको पनौती नगरपालीका-११ बल्थलीस्थित श्री लड्केश्वर आधारभूत विद्यालय पसिसरमा क्यामेरा पूजा गर्दै छायांकनको थालनी गरेको हो।
निर्देशक यम शेर्पाका अनुसार करिब ३५ दिन फिल्मको छायांकन हुनेछ। अधिकांश छायांकन काभ्रेका विभिन्न स्थानमा गरिनेछ।
यार्सा फिल्म्सको प्रस्तुति रहने यस फिल्ममा दयाहाङ राई, प्रकाश सपूत, सिर्जना निङलेखु, माओत्से गुरूङ, छुल्ठिम गुरूङ, भोलाराज सापकोटालगायत कलाकारहरूको अभिनय रहनेछ।
फिल्ममा बाल–कलाकारमा शाइसा गौचन, दिविशा पन्त, चिराग श्रेष्ठ र नमनराज गजुरेलले अभिनय गर्नेछन्।
दयाहाङ र प्रकाशको यो पहिलो सहकार्य हो। यमले भने दयाहाङसँग दोस्रोपटक सहकार्य गर्न लागेका हुन्। यसअघि उनको पहिलो निर्देशन रहेको 'कार्साङ' मा पनि दयाहाङले शीर्ष भूमिकामा अभिनय गरेका थिए।
निर्माणपक्षले फिल्मको कथाबारे जानकारी दिएको छैन। फिल्मको निर्देशनसँगै कथा पनि यम शेर्पा स्वयंले लेखेका छन्। फिल्म आलोक शुक्लाले खिच्नेछन्।
निमु शेर्पा, छोङ्बा लामा शेर्पा र आङ्छिरिङ शेर्पा निर्माता रहेको 'मिरमिरे' को सह-निर्मातामा गोविन्द बोहरा, सुदिप कुँवर र ईश्वर श्रेष्ठ छन्।
कार्यकारी निर्मातामा आरआर फिल्मसका सञ्चालक समेत रहेका फिल्म वितरक रोहित कट्टेल छन्। यसमा सुदिप कुँवरको मुख्य सहायक निर्देशन रहने छ।
'मिरमिरे' २०८२ सालमै रिलिज हुनेछ। प्रदर्शन मिति भने तय गरिएको छैन।
-1746009348.jpg)
