आगामी महिना प्रदर्शनमा आउने फिल्म 'रिमै' को शीर्षक गीत सार्वजनिक गरिएको छ।
बुधबार एक कार्यक्रमकाबीच सार्वजनिक गरिएको गीतमा फिल्मका मुख्य कलाकारहरू दयाहाङ राई, रिश्मा गुरूङ, अर्पण थापा र गौमाया गुरूङ फिचर्ड छन्। गीतमा शब्द रचना तथा कम्पोज दीपक शर्माको छ भने स्वर रिता केसी र अंशु लामा (अश बहादुर गुरूङ)ले दिएका छन्।
ग्रामीण भेगको सुन्दर दृश्य, स्थानीय संस्कृति र मौलिक भेषभुषालाई गीतमा प्रस्तुत गरिएको छ। सामूहिक नृत्य र गीतमार्फत पात्रहरूबीचको रमाइलो अन्तरक्रिया भिडिओमा देख्न सकिन्छ। भिडिओको कोरियोग्राफी मौसम हिमालीको हो।
सामाजिक तथा सांस्कृतिक कथावस्तुमा आधारित फिल्म 'रिमै' खिल बहादुर गुरूङले निर्देशन गरेका हुन्।
यो फिल्मबाट दयाहाङ राई र रिश्मा गुरूङ (कबड्डीको काजी र मैंया) को हिट जोडी पुनः एकसाथ पर्दामा देखिन लागेका छन्।
गोरखा सिरानचोक एण्ड लिगलिगकोट फिल्म्स् प्रालीको प्रस्तुति र रोटेपिङ इन्टरटेन्मेन्टको सहकार्यमा निर्माण भएको फिल्ममा बुद्धि तामाङ, माओत्से गुरूङ, कविता आले मगर, पुस्कर गुरूङ, वीरमाया गुरूङ, वीरवल घले, डिबी गुरूङ, टेक गुरूङलगायत कलाकारहरूको अभिनय छ।
बालकलाकार असिम सुब्बा, प्रेस्टु गुरूङ र प्रश्ना राना मगर लगायतले पनि यसमा अभिनय गरेका छन्।
उपेन्द्र सुब्बाको लेखन रहेको फिल्ममा टिका गुरूङ, जित यात्री गुरूङ र दुन बहादुर घले निर्माता छन्। कार्यकारी निर्माता वीरवल घले हुन् भने बिनु गुरूङ, रोशन भट्टराई र राजेश घिमिरे सह–निर्माताको रूपमा छन्। फिल्म शैलेन्द्र ध्वज कार्कीले छायांकन गरेका हुन्।
'रिमै' भदौ २० गतेबाट देशव्यापी प्रदर्शनमा आउने तयारीमा छ।
-1746009348.jpg)
