कवि तथा सङ्गीतकार प्रेम विनोद नन्दनको आइतबार राति निधन भएको छ।
लामो समयदेखि अस्वस्थ रहेका नन्दनको ९० वर्षको उमेरमा चितवन मेकिडल कलेज (सिएमसी) शिक्षण अस्पतालमा उपचारका क्रममा निधन भएको हो।
नारायणी कला मन्दिरका पूर्वअध्यक्ष अमर प्रधानका अनुसार उनी लामो समयदेखि श्वासप्रश्वासको समस्या लगायत रोगबाट ग्रसित थिए।
विसं २०११ मा ‘झटारो’ गितीसंग्रह प्रकाशन गरेर नेपाली गीत सङ्गीत र साहित्य क्षेत्रमा प्रवेश गरेका नन्दनले गजल, कविता तथा अन्य काव्यमा कलम चलाएका छन्। उनका धेरै गीत चलचित्र क्षेत्रमा चर्चित छन्।
उनका गिती सङ्ग्रह अञ्जली २०२३, सपनीबाट ब्यूँझेर २०२३, विपनीका पाइलाहरु २०५२, ऐनाभित्रको आकाश २०६३, सिद्धार्थको ग्रह त्याग लघु काव्य २०७४ र पत्रम पुष्पम कविता संग्रह २०७७ प्रकाशित भएका छन्।
यस्तै राष्ट्रिय गान छनोटका क्रममा उनको गीत उत्कृष्ट १० भित्र पर्न सफल भएको थियो।
प्रधानका अनुसार उनले लामो समय बागिश्वरी, दोभान, मारुनी, गोधुली लगायतका साहित्यिक पत्रिका पनि सम्पदान गरेका थिए।
अनौपचारिक शिक्षा आर्जन गरेर गीत संगीत र साहित्यमा लागेका नन्दन गायक, संगीतकार तथा कलाकार पनि थिए।
विसं १९९२ जेठ १९ गते तनहुँको बन्दीपुरमा जन्मिएका नन्दन पछि बसाइँ सरेर चितवनको नारायणगढ आएका थिए।
उनले छिन्नलता गीत पुरस्कार २०५४, चिसाप प्रतिभा पुरस्कार २०५२, चिसाप कृष्णकुमारी गुरुङ पुरस्कार २०६४, नारायणी प्रज्ञा पुरस्कार २०७८, राष्ट्रिय स्रष्टा सम्मान २०७७ लगायतका सम्मान तथा पुरस्कार प्राप्त गरिसकेका छन्।
उनलाई रथारोहण तथा सम्मानसमेत गरिएको थियो ।
उनको पार्थिव शरीरको आज धार्मिक तीर्थस्थल देवघाटमा अन्त्येष्टि गरिने कार्यक्रम रहेको छ। नन्दन नारायणी कलामन्दिरको पूर्वअध्यक्ष र सल्लाहकार थिए। उनका श्रीमती, तीन छोरा र तीन छोरी छन्।
-1746009348.jpg)
