नेपाली चलचित्र क्षेत्रको पूर्वाधार विकासतर्फ एउटा महत्वपूर्ण कदमका रूपमा बनेपामा निर्माण हुँदै गरेको अत्याधुनिक सुविधासम्पन्न 'सिनेपाः स्टुडियो' का लागि नेपाल सरकारले ३ करोड रूपैयाँको अनुदान बजेट प्रदान गर्ने भएको छ।
शुक्रबार सूचना तथा सञ्चार प्रविधि मन्त्रालयका योजना, अनुगमन तथा मूल्यांकन शाखाका उपसचिव रामकृष्ण अर्याल र चलचित्र विकास बोर्डका अध्यक्ष दिनेश डीसीबीच उक्त सम्झौता औपचारिक रूपमा सम्पन्न भएको हो।
'सिनेपाः' स्टुडिओ नेपाली चलचित्र उद्योगलाई प्राविधिक रूपमा सशक्त बनाउन, फिल्म निर्माताहरूलाई एकीकृत स्थानमा सम्पूर्ण सेवा प्रदान गर्न र अन्तर्राष्ट्रिय स्तरमा प्रतिस्पर्धा गर्न सक्षम बनाउन लक्षित परियोजना हो। यसमा अत्याधुनिक फिल्म छायांकन, ध्वनि रेकर्डिङ, सम्पादन, भिजुअल इफेक्ट्स (भिएफएक्स), कलर ग्रेडिङ र पोस्ट–प्रोडक्सन सुविधाहरू रहनेछन्।
चलचित्र विकास बोर्डका अध्यक्ष दिनेश डीसीले काभ्रेको ऐतिहासिक सहर बनेपामा निर्माण भइरहेको 'सिनेपाः' स्टुडियो नेपाली चलचित्र उद्योगका लागि नयाँ युगको सुरूवात हुने बताए। उनले भने, 'यो केवल स्टुडियो होइन, हाम्रो सिनेमा क्षेत्रको भविष्यमा लगानी हो।'
'सिनेपाः' को निर्माण सम्पन्न भएपछि नेपाली चलचित्रकर्मीहरूलाई विदेशमा गएर महँगो पोस्ट-प्रोडक्सन गर्नुपर्ने बाध्यता अन्त्य हुने विश्वास लिइएको छ। साथै यसले फिल्म पर्यटन, रोजगारी र सीप विकासमा पनि उल्लेखनीय योगदान पुर्याउने अपेक्षा गरिएको छ।
-1746009348.jpg)
