पछिल्लो समय बलिउड अभिनेता अक्षय कुमारका फिल्म बक्स अफिसमा फ्लप भइरहेका छन्।
'बडे मियाँ छोटे मियाँ, मिशन रानीगञ्ज, ड्राइभिङ लाइसन्स, सेल्फी' लगायत फिल्मले राम्रो कमाइ गर्न सकेन। 'ओएमजी २' ले भने राम्रै कमाइ गरेको थियो। यसैबीच अक्षयको फिल्म 'वेलकम टु द जंगल' प्रदर्शन नहुने खबर बाहिरिएको छ।
यो फिल्म सन् २०२५ डिसेम्बरमा प्रदर्शन हुने भनिएको थियो। जियो स्टूडियोजको अफिशियल च्यानलबाट फिल्म घोषणाको भिडिओ हटेपछि उक्त चर्चा सुरू भएको हो।
निर्देशक अहमद खानले यस खबर झुटो रहेको बताएका छन्। 'फिल्मको मुम्बई र कश्मीरको छायांकन शेड्युल सकिसक्यो। अक्टोबरमा इन्टरनेशनल म्याराथन सुटिङ सुरू हुनेछ। मेरो टिम त्यहाँ पहिलो भागको छायांकन गर्न हिडिसकेका छन्,' उनले भने।
फिल्ममा अक्षय कुमार, तुषार कपूर, श्रेयस तलपेडे, सञ्जय दत्त, सुनील शेट्टी, दिशा पाटनी, रवीना टन्डन, लारा दत्ता, ज्याकलीन फर्नांडिस, परेश रावल, अरशद वारसी, जोनी लिभर, कृष्णा अभिषेक, राजपाल यादवलगायत कलाकारको अभिनय रहनेछ।
