बलिउड अभिनेत्री दीपिका पादुकोण र अभिनेता रणवीर सिंहले मुम्बईको बान्द्रामा करिब ११९ करोड भारतीय रूपैयाँ (करिब २ अर्ब नेपाली रुपैयाँ) मा घर किनेका छन्।
भारतीय सञ्चार माध्यम दैनिक जागरणका अनुसार बान्द्रामा घर किनेसँगै उनी शाहरुख खान र सलमान खानको छिमेकी बनेका छन्। उनको घर मन्नत अर्थात् शाहरुख खानको निवास र ग्यालेक्सी अपार्टमेन्ट अर्थात् सलमान खानको निवासको बीचमा छ।
ओह फाइभ ओह मिडिया वकर्स एलएलपीले रणवीरसँग बान्द्राको सागर रेशम नामको भव्य भवनका लागि पनि सम्झौता गरेको छ। यो १६, १७, १८ र १९ औं तल्लामा फैलिएको छ। रणवीरको यो अपार्टमेन्ट बान्द्राको बिजे रोड ब्यान्डस्टेशनमा छ।
यो भवनको सम्झौता गर्न रणवीरसँग उनका बुबा जगजीतसुन्दर सिंह भावनानी पनि गएका थिए। उनको घर ११ हजार २६६ स्क्वायर फिटमा छ जसमा १३०० स्क्वायर फिटको बार्दली र बगैँचा छ।
दीपिका र रणवीरले गत फेब्रुअरीमा यसबारे जानकारी दिँदै सेप्टेम्बरमा आफ्नो सन्तानको स्वागतसहित नयाँ घरमा सिफ्ट हुने बताएका थिए।
