सुपरहिट भारतीय फिल्म 'सैयारा' को ओटिटी रिलिजलाई लिएर चासो बढिरहेको छ। थिएटरहरूमा यसको सफलतापछि यसै वर्ष फिल्म डिजिटल प्रिमियर हुने तयारीमा रहेको भारतीय संचारमाध्यमले जनाएका छन्।
नवोदित कलाकार अहान पाण्डे र अनित पड्डा अभिनीत रोमान्टिक फिल्मको ओटिटी रिलिजबारे आधिकारिक जानकारी भने आइसकेको छैन। मोहित सुरीद्वारा निर्देशित 'सैयारा' नेटफ्लिक्समा प्रिमियर हुने सम्भावना छ।
'सैयारा' को निर्माण ब्यानर यशराज फिल्मस्का कास्टिङ निर्देशक शानु शर्माले इन्स्टाग्राम पोस्टमार्फत ओटिटी रिलिजबारे संकेत गरेका छन्।
शानुले हालै फिल्मको पोस्टर रहेको इन्स्टाग्राम पोस्ट पुनः साझा गरेका छन्। पोस्टमा लेखिएको छ, 'सेप्टेम्बर १२ देखि नेटफ्लिक्समा स्ट्रिमिङ।'
उनको कुरा आधिकारिक हो भने सेप्टेम्बर १२, २०२५ बाट फिल्म नेटफ्लिक्समा स्ट्रिमिङ हुनेछ। निर्माताहरूले भने नेटफ्लिक्समा आधिकारिक रिलिज मिति पुष्टि गरेका छैनन्।
फाइनान्सियल एक्सप्रेसका अनुसार, नेटफ्लिक्सले 'सैयारा' को डिजिटल अधिकार प्राप्त गरेको छ। गत महिना, पोर्टलले उल्लेख गरेअनुसार ब्लकबस्टर रोमान्टिक ड्रामाको थिएटर रिलिज र ओटीटी रिलिज ८ हप्ताको अन्तरमा हुनेछ।
टाइम्स अफ इन्डियाको एक रिपोर्टमा भने 'सैयारा' का निर्माताहरूले दिपावलीमा यसको ओटिटी रिलिजलाई हेरिरहेको जनाइएको छ। फिल्मको टोली नेटफ्लिक्ससँग वार्तामा रहेको समेत जनाइएको छ।
-1746009348.jpg)
